Украины нөхцөл байдлаас үүдэн газрын тосны үнэ 103.03 ам.долларт хүрлээ

Украинд үүсээд буй нөхцөл байдалтай холбогдуулан дэлхийн зах зээл дээр газрын тосны үнэ өслөө. Лондонгийн түүхий эдийн биржийн өнөөдрийн арилжааны эхэнд 2022 оны 4-р сард нийлүүлэх Брент газрын тосны фьючерс үнэ 103.03 ам.долларт хүрч 6,39 хувиар өссөн бол 30 минутын дараа баррель нь 103.63 ам.доллар болжээ. Хамгийн сүүлд 2014 оны есдүгээр сард Брент тосны үнэ 103 ам.доллар давж байсан юм. Нефтиэс гадна алтны ханш өссөн дүнтэй байна. Өнөөдөр унц алтны ханш 1,939.97 ам.доллар болж 1.7 хувь өсжээ.