А.Адъяасүрэн : Цол хураагдсан бөхөд Баянхонгорын Бат-Орших байгаа юу

УИХ-ын өнөөдрийн чуулганаар Үндэсний баяр наадмын тухай хуулийн шинэчилсэн найруулгын төслийг хэлэлцсэн. Хэлэлцүүлгийн үеэр Баянхонгор аймгаас сонгогдсон УИХ-ын гишүүн А.Адъяасүрэн "Допингийн асуудалд холбогдсон 38 бөхөөс 3 бөхийн цол нь хураагдсан гэж ойлгож байгаа. Цол хураагдсан 3 бөхөд Хэнтийн Оюунболд, Увсын Ганзориг, Баянхонгорын Бат-Оршихын нэр байгаа юу" хэмээн хууль санаачлагчдаас асуув.

ХЗДХЯ-ны Төрийн нарийн бичгийн дарга П.Сайнзориг:

-Допингтой холбогдсон 39 бөх бий. Шийтгэлээ хүлээж байгаа буюу барилдах эрхээ хасуулсан 6 бөх байна. Та нэр зааж асуусан учраас хэлье. Энхтөгсийн Оюунболд, Нямпүрэвийн Батсайхан, Баатарын Уртнасан, Батжаргалын Батбаатар, Батжаргалын Лхагвадорж, Доржийн Ням-Очир гэсэн бөхчүүд одоогийн байдлаар МҮБХ-ны шийдвэрээр барилдах эрх нь хасагдсан байгаа.

МҮБХ-ны тэргүүн Ц.Магалжав:

-Одоо мөрдөгдөж байгаа Үндэсний баяр наадмын тухай хуулийн дагуу Б.Бат-Орших, Э.Оюунболд нарт унасан бөхчүүдийн цол, чимгийг өнгөрсөн жил олгосон. Тэгэхээр энэ хоёр бөхийн хувьд цол, чимгийг нь нөхөж олгох асуудал байхгүй. Б.Ганзориг бол 2015 оны наадмаар допингийн асуудалд холбогдож цолоо хураалгасан. Адилтгавал 2015 онд допингийн асуудалд холбогдсон Н.Адъяабат, Б.Суманчулуун нарын цолыг хураасныг 2021 онд Ерөнхийлөгчийн зарлигаар цолыг нь олгосон. Ерөнхийлөгч цол хураасан зарлигийг буцаан олгох эсэх нь өөрийнх нь асуудал гэсэн хариулт өгөв.