Монголын сэтгүүлчдэд Монголд ажиллах эрх зүйн орчин хэрэгтэй байна

Монгол Улсад өнөөдөр Катар улсын "Аль Жазийра", БНХАУ-ын "Синьхуа", Жиньминь Жибао сонин, "Хятадын төв радио, телевиз CCTV", Япон Улсын "Асахи Шимбун", "Киодо Цуушин", "Фүжи" телевиз, ОXУ-ын "Mongolnow.com", Aнгли Улсын "Ройтерс", ХБНГУ-ын "bne intelliNews", БНФУ-ын "Agence France Presse", АНУ-ын "Ассошиэйтед пресс", БНСУ-ын "КВ5" телевиз зэрэг нийт 13 хэвлэл, мэдээллийн агентлагийн 21 сурвалжлагч, зураглаач байнгын үйл ажиллагаа явуyлж байгаа аж. Ерөнхий сайд УИХ- УИХ-ын даргад хаяглан ирүүлсэн мэдээлэлдээ “Засгийн газраас гадаадын хэвлэл мэдээллийн байгуyллагын ажилтнуyдын Монгол Улсад ажиллах эрх зүйн орчныг бүрдүүлэхийг зорин ажиллаж байна”  гэжээ. Тэгвэл өнөөдөр дотоодын 502 хэвлэл мэдээллийн байгууллага бүртгэлтэй байдаг. 2019 оны судалгаагаар 430 орчим хэвлэл мэдээллийн хэрэгсэл үйл ажиллагаа явуулж, үүнд 4500 орчим хүн ажиллаж байна.

Энэ салбарт ажиллагсдын хөдөлмөрийн нөхцөл байдал, хөдөлмөрлөх эрхийг хамгаалах нь хэвлэл мэдээллийн салбарт тулгамдсан асуудал болсоор байгааг олон жилийн турш ярьсаар байдаг ч сүүлийн жилүүдэд хэвлэн нийтлэх эрхэд эрх баригчдын зүгээс бүдүүлгээр халдсаар байгааг саяхан болсон жишээнүүдээс харж байна. Фридрих Эбертийн сангаас хийсэн судалгаагаар дарамтад өртөж байсан гэж хариулсан сэтгүүлчдийн 58 хувь нь үзэл бодлын гадуурхалд өртсөн гэжээ. Тиймээс сэтгүүлчид үзэл бодлын бие даасан байдлаа хамгаалахын тулд хэвлэл мэдээллийн хэрэгслүүд байгуулж, аль болох бие даан үйл ажиллагаа явуулахыг хичээж байгаа нь нууц биш.

Сэтгүүлзүйн салбарынхан энэ бүх тулгамдсан асуудлаа шийдвэрлэхийн төлөө нэгдэж чуулж байгаа ч бодит үр дүнд хүрч чадахгүй хэвээр байна. Гэтэл нийтлэх эрх чөлөөгөө эдэлж чадахгүй, олон нийтийн мэдэх эрхийг хангах үйл ажиллагаанд цагдаагийн байгууллага ноцтойгоор халдсан, сэтгүүлчийн биед халдаж, доромжилсон зэрэг үйлдэлд өртөх боллоо. Тиймээс  эсэргүүцэж, цаашид иргэдийн мэдэх эрх, бодит мэдээллийг дамжуулах үйл ажиллагаанд саад хийхгүй байхыг шаардаж, Сүхбаатарын талбайд 12 цагаас жагсана. Яг үнэндээ Монголын сэтгүүлчдэд Монголд ажиллах эрх зүйн орчин хэрэгтэй байна.