Танил брэндийн танил бус эзэд

Huawei

Huawei брэндийг үүсгэгч, бүтээгч Рэн Жэнфэй  дунд сургуулийн багшийн гэр бүлд төржээ. Жэн барилгын дээд сургууль төгссөн бөгөөд армид ажиллаж байгаад, дөнгөж 39 настайдаа тэтгэвэрт гарч, газрын тосны компанид ажиллахаар шийдсэн байна. Хэдийгээр дараагийн ажил нь бэлэн байсан ч 1987 онд Жэнфэй өөрийн компанийг байгуулах анхны алхмаа хийсэн байна.

Хижээл насны эр Жэнфэй шинэ бизнест хөл тавьсан учраас өдөрт 16 цаг ажиллах шаардлагатай байв. Тэр гэр бүлээсээ эхлээд цөөнгүй зүйл золиослох шаардлагатай байсан бөгөөд хүүхдүүдээс нь холдуулсан гол шалтгаан болсон гэж тэр ярьдаг байна. Харин өнөөдөр “Huawei” электрон барааны зах зээлд хамгийн том тоглогчдын нэг болсон билээ.

Netflix

Netflix-ийг олон хүн санамсаргүй байдлаар гайхалтай өндөрлөгт хүрч чадсан компани гэж хардаг. Гэхдээ үүсгэн байгуулагчид нь ямар түүхийг туулж, өнөөдрийн “Netflix”-ийг бүтээснийг тэр бүр мэддэггүй.

Тус компанийг 1997 онд Рид Хастингс болон түүний найз Марк Рандолф нар үүсгэн байгуулжээ. Хоёр залуу хоёулаа маркетинг, мэдээллийн технологи чиглэлээр ажилладаг учраас тэднийг олон зүйлд нэгтгэж байв. Чухамхүү нийтлэг ашиг сонирхол дээр тулгуурлан өөрсдийн компаниа байгуулахаар шийджээ.

Бизнес эрхлэгч залуус DVD нь кассетыг орлох болно гэдгийг ойлгох тэр мөчид “Netflix” кино ертөнцийн аврагч болно гэдгийг мэдрээгүй байв. Тухайн үед киног захиалсан үйлчлүүлэгч рүү DVD-г шуудангаар илгээж, эргээд үзэгч түрээслэсэн киногоо шуудангаар илгээх шаардлагатай болж байсан нь тэднийг үйл ажиллагаагаа яаралтай сайжруулах шаардлагатай байгааг анхааруулсаар байлаа. Ингээд 2007 оноос онлайн түрээсийн үйлчилгээ үзүүлж эхэлсэн аж. Өнөөдөр Netflix дэлхийн 130 оронд үйлчилгээгээ нэвтрүүлсэн, төлбөрт видео үйлчилгээний тэргүүлэгч юм.

Chupa Chups

Chupa Chups брэндийг 1958 онд чихэр үйлдвэрлэгч Энрике Бернат сэрээгээр идэж болох чихэр хийх гэж оролдох үедээ иштэй чихэр хийх санаа төрснөөр бүтээсэн гэдэг. Энрикегийн гэр бүл бол үе дамжсан үйлдвэрлэгчид.  Тэрээр нарийн боовны 3-р үеийн тогооч байсан бөгөөд Барселонад өөрийн үйлдвэртэй байв.

Брэндийг анх GOL гэж нэрлэдэг байсан ч 1961 онд Chupa Chups нэртэй болсон. Харин логог нь алдарт Сальвадор Дали зохион бүтээжээ.