Эрүүл хооллох энгийн зарчим

Орой ажлаасаа тарж ирээд, эсвэл унтахын өмнө гэнэт өлссөнөө мэдэрч, юм идмээр санагдсан уу? Тэгвэл түр хүлээгээд өлссөн мэдрэмжээрээ биш, ЭРҮҮЛ УХААНААР орой хүнд хоол идвэл биед маань ямар хор нөлөөтэй билээ гэдгээ юуны өмнө тунгаан нэг бодоорой. Өлссөнөөсөө болж идсэн тэрхүү хүнд хоол хүнс шөнийн амгалан нойрсох нойрыг тань үгүй хийх болно гэдгийг анхаар! Нэг үгээр хэлбэл, шөнө сайхан амарч, өглөө бие хөнгөн, сэргэг сэрэхийг хүсч байгаа бол орой хүнд хоол идэхээс татгалзаарай. Ингээд энд орой идвэл биед хор болох 5 хүнсийг нэрлэж байна.

ӨӨХ ТОС ИХТЭЙ, ШАРЖ ХУУРСАН ХООЛ

Өөх тос ихтэй, шарж хуурч болгосон хүнд хоолыг оройн цагаар идсэнээс болж, маргааш гэдэг өдөр тэр чигээрээ залхуутай, нозоорсон, үлбэгэр болж хувирах болно. Учир нь, орой идсэн хүнд хоолыг бие тань, тэр дундаа хоол боловсруулах эрхтэн тань шингээж боловсруулахын тулд шөнөжингөө амралтгүй ажиллаж, түүнээсээ болж өглөө сэрэхэд таны бие амарсан биш, харин ч их ядарсан байх болно. Тиймээс оройн цагт хүнд хоолноос татгалзахын зэрэгцээ мөн түргэн хоол, самар, зайрмаг, сыр орсон хоол хүнсийг бүү хэрэглээрэй. Ингэж өлссөн мэдрэмжээ ухаалгаар шийдэж, үүнийгээ зуршил болговол өглөө бүр эрч хүчтэйгээр хөнгөн шингэн сэрж, босч чадах болно.

НҮҮРС УС БОЛОН САХАР ИХТЭЙ ХҮНС

Унтахын өмнө багахан хэмжээний амтлаг зүйл идээд орондоо ороход биед нэг их өөрчлөлт өгөлгүй сайхан амарч чадна. Харин шоколадтай нэг зүсэм бялуу ч юм уу, ялимгүй их чихэрлэг зүйлс идэх төдийд л цусан дахь сахарын хэмжээ тань өсч, эрч хүч тань суларч, улмаар шөнийн нойр тань тав тухгүй өнгөрөх болно. Тиймээс унтахын өмнө аль болох бялуу, жигнэмэг, элдэв амттанууд, цагаан гурилтай талх, нарийн боов идэхгүй байхыг хичээгээрэй. Бүр юм идмээр санагдвал алим ч юм уу калори багатай жимс бага багаар хэмэлж идэхийг зөвлөж байна.

УЛААН МАХ БОЛОН БУСАД УУРАГ ИХТЭЙ ХООЛ

 Улаан өнгөтэй мах буюу бидний өдөр тутамдаа өргөнөөр хэрэглэдэг хонь, үхэр, ямааны махан хоолыг орой унтахын өмнө идэх нь мөн л биед хор уршигтай. Уураг, илчлэг ихтэй учраас шөнийн турш хоол боловсруулах эрхтэнг тань зав чөлөөгүй ажиллуулж, биеийг тань амрах биш, илүү ядраах болно. Харин загас, тахианы махыг багахан хэмжээтэйг идвэл хор нөлөө бага хэдий ч их хэмжээгээр идвэл мөн л шөнөжин таныг “ажиллуулна”. Хэрвээ махан зүйл идмээр байгаа бол уураг багатай махыг сонгож, бууцай, жууцай зэрэг навчит ногоогоор баяжуулан идэж, эсвэл тахианы цээж мах юм уу, нэг аяга тараг уухад гэмгүй.

ХАЛУУН НОГООТОЙ ХООЛ

Халуун ногоотой хоол хүнс нь уг чанартаа бүхий л төрлийн хууч өвчнийг анагаах байгалийн эмч гэдэг. Гэхдээ орой унтахын өмнө бүр их халуун ногоотой зүйл идмээр байгаа бол халуун ногоотой амтлагч, соуснуудаас л хол байхыг зөвлөе! Халуун ногоотой хоол хүнсийг оройтож хэрэглэвэл ходоод гэдсийг хямруулах болно. Химийн гаралтай халуун ногоотой хоол хүнс хэрэглэх нь улам илүү юм идэх хүслийг тань өдөөх болно. Мөн л шөнийн нойрыг тань эзэрхийлж, тавгүйтүүлэх болно гэдгийг санаарай!

ИХ ХЭМЖЭЭГЭЭР ИДСЭН ХООЛ

Орой аливаа хоол хүнсийг хэтрүүлэн хэрэглэх нь мөн л хоол боловсруулах эрхтэнд халтай. Бүр хөнгөн зуушийг хүртэл их хэмжээгээр идчихвэл биед хүндрэл учруулах эрсдэл ч бий. Харин орой юм идмээр санагдвал 200 калорид багтаан хөнгөн зууш зооглож болох юм. Энэ нь таны өлийг дарахаас гадна шөнийн нойронд тань ямар ч асуудал үүсгэхгүй.