Б.Баасанжав: Өдөр бүр 50-60 хүн тогтмол ирж жингээ үздэг

Нар салхинд гандаж элэгдсэнийг илэрхийлэх бүдэг цэнхэр өнгөтэй хантааз, хуучин цагийн хар малгай өмсөж, усны уртыг туулж хүний олонтой учирсан шүү гэх дөлгөөн, зөөлөн харцтай энэ өвөөг “МУБИС”-ийн урд талын буудлаас өдөр бүр харж болно.

Өмнөө жин тавиад таван алхмын цаанаас найрсагаар угтан яриа өднө. Хажууд нь очоод жингээ үзэх санаатай гутлаа тайлах гэтэл “даарчихна миний охин, зүгээр дээр нь гараад зогс” гэв. Бороо дусалж, цаг агаар сэрүүн байсан учир өвөө үйлчлүүлэгч цөөнтэй байв. Б.Баасанжав гэж өөрийгөө танилцуулсан өвөө бид хоёрт тухтай хэдэн минут ярилцах зав ч гарлаа.

Завхан аймгийн Арванхутагт суманд 1954 онд мэндэлж, өдгөө 68 насыг зооглож байгаа Б.Баасанжав гуай хорин найман жил жолооч хийгээд тэтгэвэрт гарсан цагаасаа энд жин үзэж хэдэн төгрөг олдог болсон гэв. Сүүлийн үед айл бүхэн жинтэй болсон ч хаяахан нэг таарах ийм ахмадуудын жин дээр заавал зогсч үзэж байгаарай хэмээн олон нийтийн сүлжээгээр уриалах болсныг уншигч та анзаарсан л байх. Энэ бол  “хүн чанарын жин” учраас өмнөө жин тавьсан ахмадуудтайгаа таван үг солиод, цөөн хором саатаад жингээ үзчихэж байгаарай гэх залуусын уриалга үнэхээр сайхан санаа юм гэдгийг өвөөтэй ярилцаж байх зуур улам бүр мэдэрсэн.

-Б.Баасанжав гуай та энд хэдээс хэдэн цагийн хооронд суудаг юм бэ. Өдөрт хэдэн хүн “үйлчлүүлэх” юм?

-Өвөө нь өглөө 10 цагаас оройн 18 цаг хүртэл суудаг. Өдөрт 50-60 хүн ирж тогтмол жингээ үздэг шүү. Хүн ер нь сардаа ядаж дөрвөн удаа жингээ үзэх хэрэгтэй, тэгвэл жингээ барьж чадна гэж боддог юм. /инээх/

-Танайх хаана байдаг вэ? Хэдүүлээ амьдарч байна?

-Манайх 3,4-р хороололд байдаг. Эхнэр бид хоёр насаараа ажиллаж олсон мөнгө болох 71 сая төгрөгөөр одоогийн амьдардаг байраа нэлээн хэдэн жилийн өмнө авч байсан юм. Ажлаасаа буугаад л  гэр рүүгээ жингээ бариад алхчихна шүү дээ. Хүн хөгширч үхдэггүй, хөшиж үхдэг гэдэг биз дээ хүү минь. Өвөө нь архи тамхи алиныг нь ч хэрэглэдэггүй.Эмгэн маань таван жилийн өмнө тэнгэрт заларсан цагаас ганцаараа амьдардаг болсон юм. Гэртээ дөрвөн хананы дунд суугаад байх хэцүү. Ийм болохоор өвөө нь нас дээр гарсан ч, нийгэмтэйгээ ойр, хүмүүс дунд байх дуртай учраас эндээ ирдэг юм.

-Заримдаа хөгжилтэй зүйл тохиолдох уу?

-Охидууд жингээ үзчихээд уулга алдана. Тэгээд л найз залуудаа уурлаад “байнга амттай юм авч өгөөд байхаар ингэж байгаа шүү дээ” гэнэ. Манайхан хөгжилтэй хүмүүс шүү. Намайг энэ хавийхан маань андахгүй. Нийлчихээд бувар бувар гээд суух чинь наддаа жаргал.  Өчигдөр гэхэд л надад нэг хүн 2 литр сүү өгчихөөд явсан.  “Өвөө сайхан хийцтэй цай чанаж уугаарай” гэсэн. Ард түмнийхээ буянд жаргаж сууна аа. Миний охин өвөө дээрээ ирж байгаарай, өвөө нь байж л байна гээд үрчлээтэж борлосон гартаа чамбайлан атгах зуутын дэвсгэртүүдээ энгэрийн халаасандаа хийгээд гар даллан үлдлээ.

“Хүн чанарын жин гэгдэх болсон энэхүү шидэт жин тантай таарвал жингээ  үзээд хэдхэн минут саатаад яваарай. Өвөөгийн хэлсэн шиг сардаа дөрвөн удаа жингээ үзчихэд гэмгүй л байх. Амьдралдаа нэмэр болох гэж ажлын найман цаг ийн суугаа ч Б.Баасанжав гуай шиг та биднээс амар мэндийн зөрүү асууж, хэд гурван үг солих хүсэлтэй олон дундаа орших хүсэлдээ ээрэгдэх хэдэн арван хүн бас бий "

 

                                                                                                   Б.Хонгорзул