Өнөөдөр үндэсний видео тоглоомын өдөр

Жил бүрийн 9 сарын 12-ыг Нэгдсэн улсад үндэсний видео тоглоомын өдөр болгон тэмдэглэдэг. Видео тоглоомын өдрийг хамгийн анх 1990 онд Кид Вик Уарриорс багийн ерөнхийлөгч Дэвид Эрл ивээн тэттгэж, тэмдэглэж байсан бол 1991 оноос видео тоглоомын түүхийн сангийн ажилтан Фрэнк Сифальди тэмдэглэсэн нь анх Chase-ийн үйл явдлын хуанлид багтаж байв. Ингээд видео тоглоомын түүхээс өгүүлье.

1940 онд хамгийн анхны Ним нэртэй математик, стратегийн видео тоглоомыг дэлхийн үзэсгэлэнд Эдвард Кондон гэгч танилцуулж байв. Эдвард Кондон бол нэгдсэн улсын цөмийн физикч, дэлхийн 2-р дайны үед радарыг илүү хөгжүүлсэн хүн юм. Дараа нь Кембрижийн их сургууль, Массачуссетсын технологийн их сургууль хамтран “Spacewar!” тоглоомыг лабораторийн судалгаанд үндэслэн бүтээж байлаа. Харин 1967 онд “Видео тоглоомын эцэг” гэгддэг Ральф Бээрийн бүтээсэн Понг, Атари 2600, Space Invaders, Donkey Kong гэдэг тоглоомууд дэлхийг байлдан дагуулж, видео тоглоомыг таниулж байв. 1983 онд видео тоглоомын зах зээл уналтанд ороход Японы Нинтендо компани гарч иржээ. Нинтендогийн Super Mario Bros, The Legend of Zelda, Metroid зэрэг видео тоглоомоос гадна 3D тоглоом Сега гээд олон тоглоомууд ар араасаа бий болж хөгжсөөр 21-р зууныг Xbox 360, Playstation 3, the Wii гэдэг тоглоомуудаар угтсан. Өдгөө видео тоглоомын салбарт Nintendo, Sony, Microsoft компаниуд хоорондоо өрсөлдөж, VR /Virtual reality/ тоглоом хөгжүүлэлтэнд илүү анхаарч байна.

Видео тоглоомын салбар яг л кино урлагтай адил энтертейнмент ертөнцийн томоохон хэсгийн нэг бөгөөд энэ зах зээл нь жил ирэх тусам улам бүр өссөөр байна. Үүнээс гадна дээр дурдсанчлан видео тоглоом нь орчин үеийн соёлын нэгэн чухал хэсэг болсоныг дэлхийн томоохон музейнүүдийн үзмэрүүд батална. Жишээ нь 2012 онд Нью-Йоркийн алдарт орчин үеийн урлагийн MoMA музей хэд, хэдэн видео тоглоомыг байнгын үзмэр болгон сонгож, үүнээс хойш тогтмол шинэ тоглоомуудыг нэмсээр байгаа билээ. Ер нь дэлхийд хэдэн арван видео тоглоомын музей байдаг. Зарим нэг музей видео тоглоомын тусламжтай хүмүүсийн мэдлэгийг тэлэхийг зорьдог бөгөөд үүний нэг болох Их Британийн музейд The Explorer нэртэй дэлхийн түүх, археологийн олдворын сэдэвтэй флэш тоглоомууд бий.

Видео тоглоомын давуу болон сул талаас танилцуулья.

Стресс тайлах – Эцсийн эцэст хүнд өдрийн дараа стрессээ тайлж, сэтгэл санаагаа тайвшруулахын тулд бидний асуудлыг мартуулах ямар нэг өөр зүйлд сатаарахад л хангалттай. Тэгэхээр компьютерын тоглоом нь яг л ном, кино, цувралтай ижил зарчмаар үйлчилдэг гэсэн үг юм.

Тархины үйл ажиллагаанд сайнаар нөлөөлдөг – Берлинд байрлах Макс Планкийн нэрэмжит хүний хөгжил, шинжлэх ухаан судалгааны нийгэмлэгийн институтийн эрдэмтэд 2013 онд хийсэн судалгааны ажилдаа видео тоглоом нь хүний тархины хөгжилд сайнаар нөлөөлдөг болохыг баталжээ. Видео тоглоом тоглох явцад ой тогтоолт, орон зайн баримжаа, мэдээлэл боловсруулалт, сэтгэн бодох чадварыг хариуцдаг тархины хэсгүүд идэвхжсэн нь тогтоогджээ.

Бусад хүмүүстэй харилцаа тогтооход тусална – геймерүүдийн 70% найз нөхөдтэйгөө видео тоглоом тоглож, хамтдаа нэг баг болж эсвэл хоорондоо өрсөлдөх дуртай байдаг. World of Warcraft зэрэг олон тоглогчтой тоглоом дотор хүмүүс амжилтад хүрэхийн тулд хоорондоо харилцан зөвлөлдөж шийдвэр гаргадаг тул бусдад туслах, үлгэр дуурайлал болох чадварууд нэмэгдэнэ.

Түүх сонирхож, илүү ихийг унших хүслийг нэмэгдүүлдэг – Бодит түүхэнд үндэслэн зохиогдсон олон видео тоглоом байдаг. Тэдгээр тоглоомууд тэр чигтээ хүнийг түүхэн зохиолоор аялуулах бөгөөд түүхэн дүрүүдтэйгээр бодит үйл явдалд оролцуулна. Хамгийн сонгодог жишээ нь алдарт цувралуудын нэг болох Assassin’s Creed, Total War зэрэг тоглоомууд юм.

Хөгшрөлтийг удаашруулна – Айовагийн их сургуулийн эрдэмтэд 50-аас дээш насны 681 хүнийг судалгаанд хамруулж 5-8 долоо хоногийн турш тогтсон хугацаагаар видео тоглоом тоглуулахад хөгшрөлтийн улмаас үүсдэг тархины үйл ажиллагааны доройтлыг удаашруулсан гэжээ.

Гэхдээ видео тоглоомын сул тал нь тоглогч түрэмгий шинжтэй болж, хэтэрхий их цагийг тоглож өнгөрөөдөг. Мэдээж ямар ч зүйлийн хэмжээг хэтрүүлэх нь хортой шүү дээ. Эцэст нь сонирхуулахад Нокиа уналтанд орсоны дараа Финландын эдийн засагт Clash of Clans видео тоглоом ихээхэн дэмжлэг болсон гэх бөгөөд өдгөө дэлхий даяар 831,000 видео тоглоом байгаа аж.

Үндэсний видео тоглоомын өдөр