Өнөөдөр дээрэмчин шиг ярих өдөр

Жил бүрийн 09 сарын 19-ний өдрийг “Дээрэмчин шиг ярих өдөр” /Talk Like a Pirate Day/ болгон тэмдэглэдэг юм байна. Нэг үгээр бол эрт цагт дээрэмчдийн ашигладаг байсан өвөрмөц үг хэллэгийг /Jargon, Slang/ үндэсний өв соёлын нэг хэсэг, ардын аман зохиол ч гэж хэлж болно гэж үзээд тэр хэллэгүүдийг марталгүй хадгалж, сануулах түүгээр ч зогсохгүй тухайн этгээдүүдийн амьдралын хэв маягийг ч нэг өдөр олон түмэнд таниулж байхаар энэ өдрийг тэмдэглэдэг ажээ.

Анхны санаачлага нь 1995 оны 06-р сарын 06-нд хэсэг залуучууд хананы теннис /racquetball/ тоглосноос эхтэй бөгөөд тэд тоглолтын төгсгөл гэхэд тоглоом шоглоомоор бие биерүүгээ дээрэмчдийн ашигладаг байсан хэлц үгнүүдийг ашиглан хашгирч өрсөлдөгчөө сэдэлжүүлэх, урам зориг өгөх, шар хорыг нь малтахыг хичээж байжээ. Тэгээд тоглож дууссаныхаа дараа энэхүү ардын сайхан үг хэллэгийн өвийг жилдээ нэг удаа дурсаж байх өдөртэй болохгүй бол хэсэг хугацааны дараа хэн ч мэдэхгүй мартагдах юм байна хэмээн ярилцаж. Тэгээд тэмдэглэж байх өдрийн огноог сонгохдоо хэн нэг нь хуучин эхнэрийнхээ төрсөн өдрийг санал болгосон нь 09-р сарын 19 байв. Ингэж л энэ өдрийг тэмдэглэж эхлэж.

Хэдийгээр тэд ийм сайхан санаа гаргаж, огноо юмаа тохирсон ч эхний долоон жил тийм ч нийтэд танигдахуйц тэмдэглэж чадаагүй юм. Харин зохиолч, нийтлэлч Дэйв Барригийн /Dave Barry/ цахим шууданд холбогдсоноор энэ өдөр олон улсын болтлоо өргөжсөн.

Дэйв Барри өдрийг улс орон даяар сурталчилж, хилийн чанадад ч тэдний санаачлагыг дэмжсэнээр 2002 оноос өдрийг олон хүмүүс баяр хөөртэйгээр жил бүр тэмдэглэх болсон. talklikeapirate.com/wordpress/

Ухаандаа манайхан бол “Шилийн сайн эрс шиг ярих өдөр”, “Шилийн сайн эрсийн амьдралаар амьдрах өдөр”-тэй болж болох юм. Харин тэдний ярьж байсан хэв маяг, амьдралын хэмнэл хэр судлагдаж үлдсэн байдаг юм бол. Ямар ч байсан хэд хэдэн уртын болон богинын дуунд шилийн сайн эрчүүдийн тухай гарч байдаг тэгэхээр яах аргагүй л нэгэн үеийн ардын түүх, соёлын хэсэг болж байсан мэт санагдана.

Тэгэхдээ энэ бол шоронгийнхны хар ярианы үгс биш гэдгийг маш сайн ялгаж ойлгоорой.

За тэгэхээр нөхөд энэ өдрийг хэрхэн тэмдэглэж өнгөрүүлдэг талаар хэдэн жишээ оруулая: Нэгдүгээрт энэ бол зүгээр л зугаацах өдөр тул хэт дүрдээ орох хэрэггүй, бас “гурилдаад өнгөрөх” ч хэрэггүй. Хоёрдугаарт та өөрийн гадаад төрхийг дээрэмчид мэт болгоорой. Далайн дээрэмчидийн сонгодог жишээ ахмад Хук шиг модон хөл, дэгээн гар, нэг нүдээ тагласан хар боолт, мөрөн дээрээ тоть шувуутай бол бараг л ярих ч хэрэггүй та энэ өдрийг сайхан тэмдэглэж байгаа хэрэг. Харин ярих тохиодолд хэдэн сайхан үг байна.

“Son of a Biscuit Eater” /Жигнэмэг идэгчийн хүү/ Энэ үгийг та өөртөө таалагдахгүй байгаа хүнд хэлнэ. Учир нь ямар ч далайн дээрэмчин жигнэмэг иддэггүй тул тэд түүнийг арчаагүй нэгэн гэж тавлаж байгаа хэрэг. Манайхаар бол “Жижиг тугалны бэлчээр, жирэмсэн эмийн шээх газраас холдоогүй” гэдэгтэй ижил.

“All Hand Hoy!” /Бүх гарнүүд Хой/ Энэ бол бүх хүмүүс ямар нэг зүйлд туслахаар цуглахыг хэлдэг үг. Бүгд таныг тушаалыг анхаарах ёстой. Манайхаар “Дуулвал дуу нэг, дугтарвал хүч нэг” юм уу даа кк.

“Bring a Spring Upon ‘er” /Хаврыг эрт авчир/ Энэ бол та усан онгоцыг өөр чиглэлд эргүүлэх хэрэгтэйг хэлж байгаа хэрэг. Манайхаар “Цаг цагаараа байдгүй, цахилдаг хөхөөрөө байдгүй”-тэй төстэй юм уу хэ хэ.

“Grog Blossom” /Архин цэцэгт/ Манайхаар бол сайхан улаа бутарсан хүнийг хэлж болох нэршил. Дээрэмчид бол архины хамааралтайгаар хамар нь улаан болсон нөхдийг нэрлэдэг үг байж. Гэх мэт.

Мөн та энэ өдөр 1881 онд Роберт Луис Стивенсоны бичсэн "Эрдэнэсийн арал" номноос эхлээд Ж.М. Барригийн “Петер Пэн”, 1821 онд Сэр Уолтер Скотын бичсэн “Далайн дээрэмчин”, Даниел Депогийн “Алдарт ахмад Синглтоны амьдрал, адал явдал, дээрэмчид” гэх мэт номнуудыг уншиж болох юм.

Мэдээж хамгийн хялбар, амар сонголт бол алдарт “Карибын тэнгисийн дээрэмчид” цуврал, Том Хэнксийн тоглосон “Ахмад Филипс” кинонуудыг үзэх, далайн дээрэмчдийн хувцсаар гангарсан найз нарыгаа урьж үдэшлэг хийх ч энэ өдөр таныг зугаатай байлгах болно гэжээ.