Сагсан бөмбөг: "Лас Вегас Эйсес" WNBA-ийн аварга боллоо

Мэргэжлийн сагсанбөмбөгийн WNBA лигийн финалын цувралын дөрөв дэх тоглолт өнөөдөр АНУ-ын Коннектикут мужийн Анкасвилль хотын "Mohegan sun arena" ордонд боллоо.

 

Финалын эхний хоёр тоглолтод Лас Вегаст өөрийн талбайд "Тамганууд" илүүрхэн 67:64, 85:71 -ээр хожин цувралыг 2:0 болгоод байсан ч гуравдахь тоглолтод "Нарнууд" 105:76-аар бут ниргэн цувралын харьцааг ойртуулсан билээ. Гуравдахь тоглолтод "Коннектикут сан" WNBA -ийн хэд хэдэн шинэ рекордыг тогтоосон. Эхний үед 34 оноо авсан нь нэг үед авсан WNBA-ийн финалын түүхэн дэх дээд оноо. Мөн тус багийн Алисса Томас эмэгтэй НБА-ийн финалын түүхэнд анхны трипл-дабль ( 16 оноо, 15 самбар, 11 ассист) хийсэн.

 

Ингээд өнөөдөр (09.18) дөрөв дэх тоглолт эхэлсэн. Тоглолтын эхэнд болон төгсгөлд өрсөлдөгчөө илүүрхсэн " Лас Вегасын тамганууд ( хөзрийн)" 78:71 -ээр ялалт байгуулж, WNBA-ийн аварга цолыг анх удаагаа хүртлээ.

Харин "Коннетикутын нарнууд" финалд дөрөв дэх удаагаа хожигдов. Өмнө нь "Нарнууд" 2004,2005,2019 онд финалдаж байсан юм.

 

Дөрөв дэх тоглолтод Алисса Томас дахин трипл-дабль хийж бас нэг ховор амжилт тогтоосныг дурьдууштай.

 

"Лас Вегасын тамганууд" ( түүз ч гэсэн болох байх) өмнө нь 1997-2003 онд "Юта Старз", 2003 -2017 онд "Сан Антонио силвер старз" нэртэй байгаад 2018 оноос бууриа сэлгэн Лас Вегаст нутагшин шинэ нэрээрээ тоглож эхэлсэн, 2008,2020 онд финалд үлдэж байсан баг.

Энэ багийг манай сагсанбөмбөг сонирхогчдын сайн мэдэх АНУ, ОХУ-ын иргэншилтэй Бекки Хэммон энэ жил дасгалжуулж шууд л аварга цолд хүргэлээ.

 

Өөрөө WNBA -ийн бүх цаг үеийн шилдгүүдийн нэг байсан Бекки Хэммон 2008 онд АНУ-ын олимпийн шигшээд багтаагүй тул ОХУ-ын иргэншил авч Бээжингийн олимпод ОХУ-ын эмэгтэй сагсанбөмбөгийн шигшээ багт тоглон хүрэл медаль авч байсан билээ.

 

Бекки 2014 онд НБА-ийн алдарт "Сан Антонио спёрз" багийн туслах дасгалжуулагчаар томилогдон домогт Грэг Поповочийн туслахаар ажилласан , НБА-ийн түүхэнд туслахаар ажилласан хоёр дахь эмэгтэй дасгалжуулагч болж байв. Анхны НБА дахь эмэгтэй дасгалжуулагч Лиза Бойер "Кливленд"-д ердөө нэг л өдөр ажилласан бол Бекки Хэммон НБА-д 2014-2022 он хүртэл ажиллаад энэ жил эмэгтэйчүүдийн багийг дасгалжуулсан нь энэ. Тиймээс ч "Лас Вегас" -ын тоглолтод эрэгтэй мэргэжлийн сагсанбөмбөгийн олон тактик, хувилбар харагдаж буйг мэргэжилтнүүд дурьдаж байсан.

Аварга багийн гол "түүз" нь мэдээж WNBA -ийн сүүлийн улирлын MVP буюу шилдэг тоглогч Эй Жа Уилсон. Эдүгээ 26 настай, 196 см өндөр энэ бүсгүй АНУ-ын шигшээ багийн гишүүн бөгөөд 2018 оны дэлхийн аварга, "Токио-2020" олимпийн аварга.

 

За мөн финалын MVP шагнал хүртсэн Челси Грэй. Ямар ч нөхцөлд шидэлтээ оновчтой болгодог, багийн гол найруулагч, IQ болсон тоглогч. Челси "Токио-2020" олимпийн аварга.

Мэдээж гуравдахь "түүз" нь Келси Плам.

 

Багийн холбон тоглогч, 2018 оны дэлхийн аварга. Плам " Токио-2020" олимпийн наадмын сагсанбөмбөгийн 3х3 төрөлд АНУ-ын багт тоглон олимпийн алтан медаль хүртэж байсан.

Манай Монголын 3х3 эмэгтэй багийг 9:21-ээр хожиход Келси Плам гол үүрэг гүйцэтгэж байсныг манай сагсанбөмбөгийн хорхойтнууд санаж байгаа байх.

 

Дөрөв дэх " түүзээр" Жэки Янгийг нэрлэж болно. Мөн Пламтай цуг "Токио-2020" олимпийн 3х3 сагсанбөмбөгийн аварга болсон.

" Ийм хөзөр, ийм тамга" атгасан Бекки Хэмон "Лас Вегас"-ийг аварга цолд хүргэлээ.