Барилгын салбар 0 зогсолт хийлээ, Ерөнхий сайд аа

Цементийн хомсдол, тасалдал зах зээлд үүссэн учраас бүтээн байгуулалтын ажлуудаа явуулахын тулд импортын цементийн татварыг тэглэх шийдвэр гаргасан хэмээн Засгийн газраас тайлбарлаж буй. Зам тээврийн хөгжлийн сайд С.Бямбацогт ердөө өчигдөр Дарханы замын бүтээн байгуулалтын ажилд цемент үндсэн үнээр нь нийлүүлэх талаар үйлдвэрүүдтэй тохиролцсон гэж байсан. Харамсалтай нь, өнөөдрөөс дотоодын үйлдвэрийн тонн цементийн үнэ 529500 төгрөг болж даруй хоёр нугарсан байна. Долоо хоногийн хугацаанд дотоодын үйлдвэрүүд ийнхүү гурав дахь удаагаа үнээ нэмээд байгаа учраас бетон үйлдвэрлэгчид тодорхойгүй хугацаагаар үйл ажиллагаагаа зогсоохоо мэдэгдэв.

Үндсэндээ нийслэлд баригдаж байгаа бүхий л барилгын ажил өнөөдрөөс зогслоо гэж ойлгоход буруудахгүй нь.

Дотоодын цементийн гурван том үйлдвэр болох “Мак цемент”, “Монцемент”, “Хөтөлийн цемент”-ийн үйлдвэрүүд дунджаар өдөрт 9000 тонн орчим цемент үйлдвэрлэдэг ч өнөөдрийн байдлаар Хөтөлийн цементийн үйлдвэр засварын ажилтай хэмээн бүрэн зогссон. Дарханы замын бүтээн байгуулалтад дунджаар өдөрт 1000 тонн цемент шаардлагатай байгаа аж. Тиймээс нийлүүлэлт тасалдсанаас үүдэж импортын татварыг тэглэсэн ч энэ удаад "нухыг нь авах гээд нүдийг нь сохлов" гээч болов уу гэлтэй.

Барилга хот байгуулалтын яамнаас хоёр өдрийн өмнө өгсөн мэдээллээр манай үйлдвэрлэгчид эрэлтээ давж нийлүүлэлт хийж чадахгүй байгаа учраас импортын цементийн татварыг тэглэх замаар цаг хугацааны түр зуурын арга хэмжээ авсан аж. Барилга хот байгуулалтын яамны хэрэгжүүлж байгаа төв цэвэрлэх байгууламж болон 1080 айлын орон сууцны хоёр төслийн хувьд цементийн хомсдолд орсон. Тэгэхээр үнэхээр нийлүүлж хүчрэхгүй учраас эхний ээлжинд импортын татварыг чөлөөлье гэсэн шийдвэр гарсан. Одоогоор хилээр 640 мянга орчим тонн цемент орж ирж байгаа мэдээ бий гэж байсан юм.

Харин “Монполимет” группийн ерөнхийлөгч Н.Мөнхнасан “ Хувийн хэвшлийнхэн, үндэсний үйлдвэрлэгчид бид ер нь байж болох хамгийн хүнд шалгууруудтай тулалдаж, хөгжлийн хамгийн бартаатай замыг туулж, хууль шүүхийн байгууллагаар явж, үнэний талд үргэлж зогсон, итгэл мохохын ирмэг дээр ирсэн. Импортын цементийн чанар, үнэ өртөг, үүнийг дагаад үүсэх шударга бус өрсөлдөөний асуудлыг манай Засгийн газар хэрхэн зохицуулах юм бол? Дотооддоо цемент зөөх вагон хангалтгүй хэр нь импортын цемент зөөх вагон яаж олдоод байна?... Импортын цементийг оруулж ирснээр дотоодод үлдэх байсан мөнгөн урсгал, валютын гадагшаа урсгалыг хязгаарлах, дотоодын нөөцөө нэмэгдүүлэх бодлогоосоо ухарсан шийдвэр гаргалаа гэж үзэж байна. Үр дүнд нь төгрөгийн ханшийн уналт эрчимжиж, инфляц өссөнөөр иргэдийн нуруун дээрх үнийн өсөлтийн дарамт улам нэмэгдэнэ гэж харж байна” хэмээн Засгийн газрын шийдвэрт бухимдаж буйгаа илэрхийлж байсан.

Тэгвэл өнөөдөр өглөө “МАК” ХХК-ийн Ерөнхийлөгч Н.Цэлмүүн “Засгийн газар импортын 20 хувийн татварыг тэглэснээр цементийн үнэ буураагүй ба Хятад цемент Улаанбаатарт 570,000 ₮-р зарагдаж байна. Тэгээд ч ханшийн сулрал, тээврийн зардлын өсөлт мөн боомтуудын гацаа, шинэ Хөдөлмөрийн хууль, Хөгжлийн банкны өндөр хүүгээс эхлээд цемент үйлдвэрлэлийн өртөг нэмэгдэх олон шалтгаан байна” хэмээн тайлбартайгаар дотоодын үйлдвэрүүд цементийнхээ үнийг нэмснийг зарласан гэж болно.

Үйлдвэрлэгчдийн зүгээс цементийн хомсдол бол хувийн хэвшлийнхнээс бус харин Төрийн өмчит үйлдвэрээс бас төрийн зохицуулах ёстой дэд бүтцийн асуудлаас үүдэлтэй гэдгийг онцолж байсан юм.

Засгийн газрын хувьд цементийн үнийг буулгах гэсэндээ биш нийлүүлэлтийг хэвийн хэмжээнд хангах зорилгоор импортын татварыг гурван сарын хугацаанд тэглэсэн гэж байсан ч харамсалтай нь барилгын салбарыг бүрэн “0” зогсолт хийхэд хүргээд байна. Бетон үйлдвэрлэгчид үйлдвэрээс гарч байгаа цементийн үнэ 530-аад мянган төгрөг болсон учраас цаашид үйл ажиллагаа явуулах боломжгүй гэдгээ албан ёсоор мэдэгдсэн нь Засгийн газрын шийдвэр байндаа онож чадсан уу гэдэг асуултад тодорхой  хариулт өгөв бололтой.