Нийгмийн сүлжээний чатаар санхүүгийн хэлэлцээр хийсэн нь хууль зөрчсөн гэж үзжээ

АНУ  Barclays, Bank of America, Citigroup, Credit Suisse, Goldman Sachs, Morgan Stanley, UBS зэрэг олон улсад тэргүүлэгч 16 санхүүгийн компанид нэгдсэн дүнгээр 1.8 тэрбум ам.долларын торгууль ногдуулсан байна.

Эдгээр компанийн ажилтнууд нийгмийн сүлжээний чат, аппликейшн болон ухаалаг гар утас зэрэг хувийн хэрэглээний төхөөрөмжөөр бизнес, санхүүгийн яриа, хэлэлцээр хийсэн нь хууль зөрчсөн үйлдэл болжээ. Bank of America болон Nomura нараас бусад компани зөрчил гаргасан буруугаа хүлээн зөвшөөрч үйл ажиллагааны дотоод журмаа шинэчилж эхэлсэн. Дээрх хоёр компани ямар нэг хариу өгөөгүй байна.

АНУ-ын Үнэт цаас, биржийн хороо болон Түүхий эдийн фьючерс арилжааны комиссоос хамтран баталсан тогтоолын хүрээнд салбарын хэмжээнд өргөн хүрээний шалгалт хийсэн. Улмаар нэр бүхий 16 компанийн ажилтнууд 2018 оны нэгдүгээр сараас 2021 оны есдүгээр сарын хооронд хувийн төхөөрөмж ашиглан өр, хөрөнгийн хэлцэл зэрэг бизнесийн яриа тогтмол хийж байсан бөгөөд тэдгээр харилцан яриагаа архивлан хадгалаагүй болохыг олж тогтоожээ. Энэ бол брокер, дилерийн компаниуд, зарим төрлийн бусад санхүүгийн байгууллага бизнесийн харилцаагаа заавал архивлах ёстой гэсэн холбооны дүрмийг зөрчсөн үйлдэл юм. Санхүүгийн зах зээлийг хянах, холбогдох дүрэм журмын хэрэгжилтэд хяналт тавих, мөрдөн шалгах ажиллагаа зэрэг саад учруулсан гэж хууль хэрэгжүүлэгчид тайлбарлалаа.

Эх сурвалж: Reuters