Өнөөдөр амьдралаа үнэлэх өдөр

Жил бүрийн 10 сарын 19-ний өдрийг “Амьдралаа үнэлэх өдөр” /Evaluate Your Life Day/ болгон тэмдэглэдэг аж. Нэг үгээр энэ өдөр та өнгөрсөн амьдралдаа юу хийж, ямар гавьяа байгуулсан, ямар алдаа гаргаснаа үнэлэхээс гадна ирээдүйгээ хэрхэн төлөвлөж байгаа, тэнд очихын тулд ямар замааря, яаж явах нь зүйтэйгээ үнэлэх өдөр ажээ. Бид зүтгээд л байдаг ч тэр болгон “үнэлгээ” хийдэггүй сул талтай гэнэ.

Магадгүй та өнгөрсөн үеийн алдаануудаа сайн дүгнэж чадвал ирээдүйд илүү аз жаргалтай байхын тулд өөрийн амьдралын хэв маяг, зорилгоо ч өөрчилж болно гэсэн үг.

Магадгүй таны үнэлгээ өөрийг тань маш зөв, хамгийн боломжит амжилттай явааг харуулж болох юм.

Энэ өдрийг wellcat.com сайтад хамаардаг шилдэг хэвлэн нийтлэлч, ТВ шоу зохион байгуулагчид гэх мэт хүмүүс анх санаачилжээ. Тэд хүмүүс биднийг өөрсдийн амьдралаа ойр ойрхон үнэлж байвал харьцангуй бага алдаа гаргаж, илүү бүтээмжтэй, аз жаргалтай амьдрах бололмжтой гэж үзсэн аж.

Анх сонсоход их хүнд, нүсэр ажил мэт санагдаж байгаа боловч яг үнэндээ сургуульд сурч байхдаа гэрийн даалгавраа хийж дуусаад алдаа оноогоо шалгадаг байсантай л адилхан. Зарим тохиолдолд ингэж хийсэн зүйлээ үнэлэлгүй багшдаа хураалгасан үедээ энгийн зүйл дээр ч алдаад онцгүй дүн авсан тохиолдол байдаг даа. Яг л энэ гэсэн үг. Харин амьдралыг үнэлэгч нь таны амжилт байх болно.

Дэлхий дээр хувь хүн өөрийн амьдралаа үнэлж цэгнэх маш олон аргууд бий болсон. Та энгийн интернэтийн хайлтын систем ашиглаад “амьдралаа хэрхэн үнэлэх вэ?” гэж бичихэд л хэдэн мянган маш сайн нийтлэл, бичлэг, зурган тайлбар олж чадна. Та харин тэрнээс өөрийн амьдрал, ажил мэргэжлийн онцлог, цаг зав, үндэсний онцлогтоо таарсан хувилбарыг олоод багахан цаг гарган чин үнэнчээр өөрийн амьдралаа үнэлэхэд л хангалттай.

Жишээлбэл: Харвардын бизнесийн сургуулийн профессор К.Кристенсен "How Will You Measure Your Life" бестселлер номондоо доорхи гурван асуултыг өөрөөсөө асуугаарай гэсэн. Асуулт энгийн боловч таны ажил болон гэр бүлдээ хэрхэн анхаарлаа хандуулах, ёс зүйн хувьд хэр зөв хүн байгаагаа үнэлхэд яг таарна.

1.Kарьертаа сэтгэл хангалуун байхын тулд би яах хэрэгтэй вэ?

Энэ асуултанд хариулахын тулд та ирээдүйд өөрийг тань болон гэр бүлийг тань илүү аз жаргалтай байх суурь болсон ажил мэргэжилдээ хэрхэн хандаж байгаадаа үнэлгээ өгнө. Өмнө нь тодорхой алдаа гаргаж байсан бол түүнийгээ хэрхэн засч, сайжруулах, ирээдүйд яаж илүү сайн ажиллаж, албаэн тушаал ахиж, мэргэжлийн хувьд төгөлдөржих тухайгаа тунгаана гэсэн үг юм.

2. Гэр бүлийнхэнтэйгээ харилцах харилцаа маань үргэлж надад аз жаргал өгдөг байхын тулд би яах хэрэгтэй вэ?

Харин энэ асуулт бол магадгүй ажил, орлого олон, амжилт гаргахын хажуугаар хэзээ ч орхиж болохгүй гэр бүлдээ хэр анхаарал тавьж байгаа, тэдэнтэйгээ холбоотой харилцаандаа алдаа гаргаж байгаа эсэхдээ, гэр бүлийнхээ хүрээнд илүү аз жаргалтай байх тухайд өнгөрсөн, одоо, ирээдүйгээ дүгнэхэд тань туслана

3. Хэзээ ч шоронд орохгүй байхын тулд би яах хэрэгтэй вэ?

Та сайн, амжилттай албан хаагч, ажилтан, хэн ч харсан сайн гэр бүлийн гишүүн, бусдын хайрыг татсан найз боловч үнэн хэрэгтээ дотоод мөн чанар тань хүмүүнлэг, үнэнч шударга, ёс зүйг эрхэмлэгч нэгэн мөн үү? гэдгээ үнэлхэд тань энэ асуулт туслана. Номын эзэн энэ талаар тусгайлан “Гурав дахь асуулт хэтэрхий амархан санагдаж байж магадгүй ч, тийм биш. Учир нь нэр хүндтэй Rhodes тэтгэлэг авсан шилдэг 32 сурагчийн маань 2 нь шоронд орж байсан. Санхүүгийн хамгийн том скандал үүсгэсэн компаниудын нэг Enron-ы захирал Жеф Скиллинг гэхэд (Харвардын бизнесийн сургуульд надтай нэг ангид цуг сурч байсан) тэрээр санхүүгийн гэмт хэргээр 14 жилийн хорих ял авсан. Тэд хэдийгээр сайн залуус байсан ч, амьдралд ямар нэгэн зүйл тэднийг буруу зам руу хөтөлсөн юм.” гэж онцолжээ. Та ч бас амьдралаа шударгаар үнэлж үзээрэй. “Хэн эрт үнэнтэй нүүр тулна тэр хүн бусдаас түрүүлж амжилтанд хүрдэг” гэдэг үгийг сануулая.