АНУ, Тайвань хамтран зэвсгийн үйлдвэрлэл эрхлэх асуудлыг хэлэлцэж эхэлжээ

Nikkei Shimbun сонин энэ сарын 19-ний өдөр Жо Байдены засаг захиргаа Тайваньтай хамтран зэвсэг үйлдвэрлэх төлөвлөгөөг хэлэлцэж байгаа талаар онцолжээ.

АНУ-ын Засгийн газар Тайваньтай хамтран агаарын довтолгооноос хамгаалах зөөврийн систем, өндөр хурдны хөдөлгөөнт их бууны пуужингийн систем, сум зэргийг үйлдвэрлэх төлөвлөгөөг хэрэгжүүлэхээр хэлэлцэж байгаа тухай мэдээлсэн байна. Хоёр орон хамтран зэвсэг үйлдвэрлэх тал дээр эхний шатны хэлэлцээр эхэлсэн гэжээ. Улмаар АНУ-ын батлан ​​хамгаалахын компани Тайваньд зэвсэг үйлдвэрлэх технологийг нийлүүлэх эс бөгөөс Тайваньд үйлдвэрлэсэн эд ангиудыг ашиглан АНУ-д зэвсэг үйлдвэрлэх эсэх талаар мөн хэлэлцэж байгаа аж.

Хятадын талын аюул заналхийллээс зайлсхийхийн тулд Байдены засаг захиргаа ийнхүү Тайваньд зэвсгийн нийлүүлэлтийг түргэтгэх зорилгоор хамтран зэвсэг үйлдвэрлэх талаар хэлэлцэхэд хүрсэн бололтой. Хятад Улс 2027 он гэхэд Тайвань руу довтлох бүхий л бэлтгэлээ базааж дуусна хэмээн АНУ үзэж байгаа ба Тайванийн хувьд батлан ​​хамгаалах чадавхиа бэхжүүлэхэд хангалттай хугацаа төдийлөн байхгүй байгааг онцолжээ. Украинд их хэмжээгээр зэвсэг нийлүүлж байгаагийн улмаас “Stinger", "HIMARS" зэрэг сүүлийн үеийн өндөр чадал бүхий зэвсгийн нөөц багассан зэрэг нь Тайваньтай хамтран зэвсэг үйлдвэрлэхээр төлөвлөж буйн бас нэгэн гол шалтгаан гэж үзэж болох юм.

"Байдены засаг захиргаа нь Тайванийн зэвсэг болон зэвсэг бүтээхэд шаардагдах эд ангиудыг бусад улс орнуудад нийлүүлэхтэй холбоотой судалгаа шинжилгээг эхлүүлсэн” болохыг Nikkei мөн дурджээ.

Эх сурвалж: Maeil