Сомалийн нийслэлд террорист халдлага болж, 100 гаруй хүн амь үрэгджээ

Сомалийн нийслэл Могадишу хотын Боловсролын яамны ойролцоо тэсрэх бөмбөг суурилуулсан хоёр машин дэлбэрсэн байна. Дэлбэрэлтийг "Аль-Каида"-тай холбоотой ажилладаг "Аль-Шабааб" бүлэглэл үйлдсэн гэдгээ хүлээсэн байна.

Дэлбэрэлтийн улмаас 100 гаруй хүн амиа алдаж, 300 гаруй хүн шархаджээ. Энэ тухай өнөөдөр тус улсын Ерөнхийлөгч Хассан Шейх Махмуд мэдэгдэв. Орон нутгийн "Shabelle Media Network" сувгийн  мэдээлснээр амиа алдагсдын дунд дүүргийн цагдаагийн дарга Ходан Хуссейн Адед, Сомалийн нэрт сэтгүүлч Мохамед Иссе Кона нар байжээ. Шархадсан хүмүүсийн биеийн байдал хүнд байгаа тул амиа алдагсдын тоо нэмэгдэж магадгүй гэжээ.

Халдлага 10 дугаар сарын 29-ний үдэш болсон байна. Амиа золиослогчийн жолоодож явсан эхний машин тус улсын Боловсролын яамны гадаа хөл хөдөлгөөн ихтэй уулзварын ойролцоо дэлбэрчээ. Эмгэнэлт явдал болсон газарт түргэн тусламжийн машинууд ирж, хүмүүс хохирогчдод туслахаар ойртоход хоёр дахь дэлбэрэлт болжээ. Дэлбэрэлт болсны дараа зэвсэгт бүлэглэлийнхэн яамны байр руу нэвтэрч, хамгаалалтын албаныхантай буудалцсан байна.

Одоогоос таван жилийн өмнө буюу 2017 оны аравдугаар сарын 14-нд Могадишу хотын нэг уулзвар дээр мөн ийм халдлага гарч, 587 хүн амиа алдсан юм.