ОХУ-ын 17 тэрбум ам.доллароор үнэлэгдэх хөрөнгийг битүүмжилжээ

Европын холбооны зүгээс ОХУ Украинд халдан түрэмгийлснээс хойш тус улсын эсрэг авч буй хориг арга хэмжээний хүрээнд олигархууд болон аж ахуй нэгжүүдийн эзэмшиж байсан 17 тэрбум ам.доллароор үнэлэгдэх хөрөнгийг битүүмжлэсэн талаар Их Британийн The Guardian сонин мэдээлэв.

Европын Холбооны Хууль зүйн комиссар Дидье Рейндерс FAZ агентлагт өгсөн ярилцлагадаа, "Өнөөдрийг хүртэл ХБНГУ-ын засгийн газрын битүүмжлээд буй 2.2 тэрбум ам.долларын хөрөнгийг оролцуулаад бусад долоон гишүүн орны битүүмжилсэн нийт хөрөнгийн хэмжээ 17 тэрбум ам.доллароос даваад байна” хэмээн цохон тэмдэглэжээ.

 7 дугаар сард Европын холбооны таван гишүүн улсын битүүмжилсэн хөрөнгийн хэмжээ 13.8 тэрбум ам.долларт хүрсэн хэмээн мэдээлж байсан юм

Өнгөрөгч 2-р сард ОХУ Украинд халдан түрэмгийлснээс хойш Европын холбоо тус улсын ерөнхийлөгч Владимир Путин, Гадаад хэргийн сайд Сергей Лавров тэргүүтэй 1158 иргэн, 98 аж ахуй нэгжийн хөрөнгийг битүүмжилжээ.

Украины тал эдгээр битүүмжилсэн хөрөнгийг улс орныхоо сэргээн босголтод зарцуулахын тулд хураан авах эсвэл дайны гэмт хэрэг үйлдсэнийх нь хариуцлагыг ОХУ-аар албадан нөхөн төлөх ёстой хэмээн үзэж байгаа юм. Гэвч зарим улс, тэр дундаа АНУ-ын эсэргүүцэлтэй тулгарсны улмаас энэ санал төдийлөн дэмжлэг авахгүй байна.

Украинд дайны дараах сэргээн босголтод нийт 57 тэрбум доллар шаардлагатай гэсэн тооцоо бий.

Эх сурвалж: Newsis