NASA 71 тэрбум ам.долларын эдийн засгийн бүтээмжтэй ажилласан гэв

Америкийн сансар судлалын байгууллага болох NASA  санхүүгийн нэг жилийн эдийн засгийн үр нөлөөллийн тайлангаа  танилцууллаа. Тэд Ангараг гараг хүртэлх бүх үйл ажиллагаа, уур амьсгалын өөрчлөлтийн судалгаа, технологийн хөрөнгө оруулалт зэрэг ажил нь 71.2 тэрбум орчим ам.долларын эдийн засгийн бүтээмж гаргасан тухай олон нийтэд мэдээлэв.

2021 оны санхүүгийн нэг жилийн хугацаанд NASA Америкийн хэмжээнд 339,600 гаруй ажлын байрыг хадгалахын зэрэгцээ холбоо, муж, орон нутагт нийт 7.7 тэрбум ам.долларын татвар төвлөрүүлсэн байна. Америкийн бүх муж NASA-ийн үйл ажиллагаанаас эдийн засгийн хувьд ашиг хүртдэг. Шинжлэх ухааны судалгаа, технологи хөгжүүлэх үйл ажиллагааны чиглэлд дотоодын болон олон улсын 2,655 гэрээ хүчин төгөлдөр үйлчилж байна. Мөн олон улсын сансрын станц нь олон улсын хамтын ажиллагааны чухал төлөөлөгч бөгөөд 15 улс, таван сансрын агентлагийг төлөөлөн 20 гаруй жил үйл ажиллагаагаа явуулж байгаа юм. NASA агентлагийн 2021 оны санхүүгийн жилийн эдийн засгийн гарц нь тус агентлаг анхны тайлангаа гаргасан 2019 оны санхүүгийн жилээс 10.7 хувиар өсжээ.