Дмитрий Медведев: Оюутнуудыг цаазаар авах ёстой

Уфа хотын Советский/Зөвлөлтийн/ дүүргийн шүүхээс дөрвөн оюутныг зохион байгуулалттай бүлэглэл байгуулж террорист халдлага үйлдсэн хэргээр баривчилсан гэж Башкирийн шүүхүүдийн хамтарсан хэвлэлийн алба мэдээлэв. Мөрдөн байцаагчдын үзэж байгаагаар тэд "Украинд тусгай ажиллагаа явуулахыг эсэргүүцэж, Башкирийн эрх баригчдын ажлыг тогтворгүй болгох зорилгоор, төмөр замын цахилгаан тоног төхөөрөмжийг гэмтээхийг оролдсон" гэжээ.

"Шүүх мөрдөн байцаагчийн хүсэлтээр, дөрвөн яллагдагчийг арванхоёрдугаар сарын 28-ныг хүртэл цагдан хорих таслан сэргийлэх арга хэмжээ авахаар шийдвэрлэлээ" гэж Башкирийн шүүхийн хэвлэлийн алба мэдээлснийг Интерфакс агентлагаас иш татан мэдээлэв. Гурван 18-н настай, нэг 17-н настайшүүгдэгчийг террорист ажиллагаа явуулахыг завдсан, алан хядах ажиллагаа үйлдсэн хэрэгт буруутгаж байгаа талаар тус агентлагаас тодруулжээ. Эрүүгийн хуулийн эдгээр зүйл анги 12-20 жил хорих ял оноодог.

Оросын хэвлэл мэдээллийн хэрэгслүүдийн мэдээлснээр, хэргийн яллагдагчаар 18 настай Фаррухжон Зокиров, Мустафа Шахбазов, Эмин Садыгов болон түүний 17 настай дүү нар байгаа юм. Мустафа Шахбазов өөрийн “ВКонтакте” хуудсандаа ОХУ-ын Дотоод хэргийн яамны Уфа хуулийн дээд сургуульд сурдаг, тулааны урлаг, рэп урлагт дуртай гэж "Коммерсант" сонинд бичжээ. Эмин Садыгов Уфа хотын нисэхийн коллежид, дүү нь Муса Гареевын нэрэмжит агаарын десантын кадет корпуст сурдаг.

Шүүхийн хэвлэлийн албаны мэдээлснээр шүүгдэгчид "Украинд тусгай ажиллагаа явуулахыг эсэргүүцэж, Башкирийн эрх баригчдын ажлыг тогтворгүй болгоно хэмээн найдаж" төмөр замын цахилгаан хэрэгслийг гэмтээхийг дор хаяж таван удаа оролдсон гэж тэмдэглэжээ. Эдгээр дөрвөн оюутны хоёрыг өнгөрсөн сарын 27-нд Башкирийн “ФСБ” буюу ҮАХА-ны ажилтнууд Куйбышевын төмөр замын гол гарцын баруун “Белая" постыг шатаах гэж байхад нь баривчилсан гэж хууль сахиулах байгууллагын эх сурвалж мэдээлэв.

Уфа дүүргийн шүүхийн шийдвэр гарсан өдөр Аюулгүйн зөвлөлийн дэд дарга, ОХУ-ын ерөнхийлөгч асан Дмитрий Медведев өөрийн “Telegram” сувагтаа "хорлон сүйтгэгчид" болон ийм хүмүүст цаазаар авах ял оноох ёстой гэжбичжээ.Тэрээр цэргийн дайчилгаа эхэлснээс хойш пайчилгааны байрыг галдах зэрэг янз бүрийн хорлон сүйтгэх ажиллагаа нэмэгдсэнийг дурдаад Медведев үүнийг "хамгийн аюултай гэмт хэрэгтнүүдэд цаазын ял оногдуулах ялыг сэргээх сайхан боломж" гэж бичсэн байна.