Энэтхэг ОХУ-ын газрын тосны бүтээгдэхүүнийг худалдаж авсаар байх болно гэв

Энэтхэгийн Гадаад хэргийн сайд Субраманям Жайшанкар ОХУ-аас газрын тосны бүтээгдэхүүн үргэлжлүүлэн худалдан авсаар байх болно хэмээн өчигдөр өдөр мэдэгджээ.

Жайшанкар болон ОХУ-ын Гадаад хэргийн сайд Сергей Лавров нар мөн өдөр Москва хотноо дээд хэмжээний уулзалт хийсэн бөгөөд уг уулзалтын дараа зохион байгуулсан хэвлэлийн бага хурлын үеэр хэлэхдээ "ОХУ бол найдвартай, олон жилийн турш шалгуурыг давсан түнш юм" гээд дээрх мэдэгдлийг хийсэн байна.

“Их 7”-гийн бүлэг ирэх сарын эхнээс Оросын газрын тосны бүтээгдэхүүний үнэд дээд хязгаар тогтоох шийдвэрийг эцэслэн баталсан талаар ямар бодолтой байгааг асуухад тэрээр “Энэтхэг бол газрын тос, байгалийн хийн хэрэглээгээрээ дэлхийд гуравдугаарт ордог ч орлогын түвшин тийм ч өндөр биш" хэмээн тэрээр цохон тэмдэглэсэн байна.

“Ний нуугүй хэлэхэд ОХУ-тай харилцах харилцаа бидний талд ашигтай байгаа нь олон ч зүйлээс тодорхой харагдаж байна. Хэрэв бидэнд ашигтай байгаа бол бид үүнийг хадгалж авч үлдэхийг хүсэх нь гарцаагүй” хэмээжээ.

Өнгөрсөн хоёрдугаар сард ОХУ Украин руу халдан түрэмгийлснээс хойш тус улсын эсрэг барууны орнууд хориг арга хэмжээг өргөн хүрээтэйгээр авч хэрэгжүүлсээр байгаа билээ. Харин энэ үеэс хойш Энэтхэг улс нь ОХУ-ын газрын тосны салбарын томоохон хэрэглэгч болоод байгаа ба импортын хэмжээгээр БНХАУ-ын дараа хоёрдугаарт бичигдэх болсон байна.

Түүнчлэн мөн өдөр хоёр улсын сайд нар батлан ​​хамгаалах салбарын төслүүдэд хамтран ажиллах талаар хэлэлцсэн аж. Тодруулбал хоёр улс хамтран орчин үеийн цэргийн техникийг үйлдвэрлэх, цаашлаад технологийн хамтын ажиллагааг хөгжүүлэх талаар санал солилцсон болохыг сайд Лавров хэвлэлийн хурлын үеэр мэдэгдэв.

Тэрээр үргэлжлүүлэн ОХУ-ын зүгээс цөмийн болон сансрын салбарт ч нягт хамтран ажиллах хүсэлтэй байгаагаа Жайшанкар сайдад уламжилсан хэмээн онцлов.

Эх сурвалж: Yonhap