Украины ерөнхийлөгч Москватай хэлэлцээ хийх нөхцөлөө нэрлэжээ

Киевийг Москватай яриа хэлэлцээ хийхийг ятгаж байгаа гэдэг мэдээлэл өрнөдийн хэвлэлүүд гарсны дараа Украины ерөнхийлөгч Володимир Зеленский ийм яриа хэлэлцээ хийх нөхцөлийг нэрлэсэн талаар хэвлэлүүд мэдээлж байна. АНУ-ын өндөр албаныхны зүгээс Киевийг Оростой яриа хэлэлцээ хийхэд бэлэн байдал харуулахад уриалсан гэдэг мэдээлэл хэд хоногийн өмнө Вашингтон пост сонинд гарч байсныг хэвлэлүүд энэ үеэр мөн сануулж байна.

Телеграм сувагтаа нийтэлсэн энэ бичлэгтээ Зеленский, “улсынх нь нутаг дэвсгэрийн бүрэн бүтэн байдлыг сэргээх, НҮБ-ын дүрмийг хүндэтгэх, дайнаар учирсан бүх хохирлыг барагдуулах, цэргийн гэмт хэрэгтэн нэг бүрт шийтгэл ногдуулах, мөн дахин ийм явдал гаргахгүй байх баталгаа гаргуулах гэсэн шаардлагуудыг” дахин нэрлэжээ. Мөн энэ шаардлагууд туйлаас ойлгомжтой гэдгийг тэр бас дурдсан байгаа юм байна. Киевийн хүчнийхэн Херсоныг эзэлж авсан тохиолдолд Украины асуудлаар хэлэлцээ эхэлж болох юм гэдэг барагцаа тооцоолол АНУ болон НАТО-гийн орнуудад байгаа тухай италийн “Ла репаблика” сонинд мөн мэдээлж байсан байна. Оросын Ерөнхийлөгчийн хэвлэлийн төлөөлөгч Дмитрий Песковын тухайд, Москва Украинтай яриа хэлэлцээ хийхэд бэлэн хэвээр байгаа боловч Киев татгалзсаны улмаас боломжгүй байгаа гэдгийг мэдэгдэж байжээ. Үүний зэрэгцээ Америкийн Цагаан ордны Үндэсний аюулгүй байдлын асуудал эрхэлсэн зөвлөх Жейк Салливан сүүлийн хэдэн сарын туршид Оросын өндөр албаныхантай холбоо харилцаатай байсан гэдгээ нотолсон байна. Кремлиэс холбоо таслахгүй байх АНУ-ын эрх ашгийн үүднээс энэ харилцааг өрнүүлж ирсэн гэж Салливан даваа гарагт Нью-Йоркт болсон нэгэн арга хэмжээн дээр ярьжээ.

Би-Би-Си-гийн мэдээлснээр, Салливан Оросын Холбооны аюулгүй байдлын зөвлөлийн нарийн бичгийн дарга Николай Патрушев, Кремлийн гадаад бодлого эрхэлсэн зөвлөх Юрий Ушаков нартай хэлэлцээ хийж байсан байна. Тэд Украины дайнд цөмийн зэвсэг хэрэглэж улам даамжрах эрсдлээс сэргийлэх арга замуудыг хэлэлцэж байсан гэдгийг энэхүү яриа хэлэлцээнд ойр өндөр албаны эх сурвалжууд “Уолл стрит жорнэл”-д мөн мэдээлжээ. Оростой хэлэлцээ хийх нь зүйтэй гэдэг байр суурь дээр өнөө хэр бат зогсч байгаа Ерөнхийлөгч Байдений хамгийн өндөр тушаалын зөвлөхийн нэг гэж тооцогддог Салливан, Москватай холбоо харилцаатай байх нь “энэ хямралд оролцогч улс болгоны ашиг сонирхолд нийцнэ” гэдгийг хэлсэн байна. АНУ-ын үндэсний аюулгүй байдлын Зөвлөлийн хэвлэлийн төлөөлөгч Эдриен Уотсон энэ мэдээллийг нотлохоос татгалзсан бол, Кремлийн Хэвлэлийн төлөөлөгч Дмитрий Песков өрнөдийн сонинуудыг “элдвийн түүх домог нийтэлдэг” гэж буруутгасан байна. Цагаан ордны хэвлэлийн төлөөлөгч Карин Жан-Пьер харин Оростой яриа хэлэлцээ явуулах эрх нь АНУ-д бий гэж өчигдөр мэдэгджээ.