Сагсан бөмбөг: Вьетнамын шигшээ багийн "Онцлоx" тоглогч Жастин Яан

2025 оны Ази тивийн сагсан бөмбөгийн аварга шалгаруулах тэмцээний урьдчилсан шатанд өрсөлдөх эрхийн төлөөx D хэсгийн тоглолтууд энэ сарын 10-14 өдрүүдэд Улаанбаатар хотод болно.

Манай үндэсний шигшээ баг D хэсэгт Тайланд, Малайз, Вьетнам, Таити гэсэн 4 орны багтай хамт багтсан бөгөөд эдгээр 4 орны шигшээ багаас тус бүр нэг тоглогчийг Монголын сагсанбөмбөгийн холбооноос онцлон танилцуулж байгаа юм.

Вьетнамын шигшээ баг нь Олон улсын сагсан бөмбөгийн холбоо /ФИБА/-ны чансаанд 139-т бичигдэж байна. Түүхэндээ 2 удаа буюу 1963, 1965 онуудад Азийн АШТ-д оролцож байсан. Үүнээс хойш 57 жилийн хугацаанд нийт 27 удаагийн Ази тивийн АШТ-д тоосоо өргөж чадалгүй өнжжээ. Тэр ч утгаараа Вьетнамын сагсан бөмбөгийн холбоо үндэсний шигшээ багийнхаа амжилтад ахиц гаргах зорилгоор 2017 оноос хойш Америк мэргэжилтнүүдийг эх орондоо урин авчирч шигшээ багаа удирдуулж эхэлсэн байна. Үүний үр дүнд 2019 онд Вьетнамын шигшээ баг түүхэндээ анх удаа Олон улсын тэмцээнээс медаль хүртсэн нь Зүүн Өмнөд Азийн наадмын хүрэл медаль байв.

Мөн өнгөрсөн зун зохиогдсон Зүүн Өмнөд Азийн наадамд 4 дүгээр байрт орж, амжилтаа бататгах дөхсөн. Сүүлийн жилүүдэд гаргаж байгаа энэ үсрэнгүй амжилтад нь дасгалжуулалтын арга барил нөлөөлснөөс гадна АНУ-д төрж өсөж, сагсан бөмбөгийн боловсролыг багаасаа эзэмшсэн Вьетнам залуучуудын нөлөө их байсан. Эдгээр залуусын нэгэн төлөөлөл бол Жастин Еоунь /Justin Young/ юм. 

Вьетнамын шигшээ багийн довтлогч Жастин Еоунь нь 1993 оны 3 дугаар сарын 9-нд АНУ-ын Калифорни мужийн Монтерей Парк хотод төрсөн. Тэрээр багадаа гольф, теннис, усанд сэлэлтийн спортоор хичээллэж үзсэн ч үе тэнгийнхнээсээ өндөр байсан учраас 10 насандаа сагсан бөмбөгийн спортыг сонгожээ.

Анхандаа найзуудтайгаа цагийг зугаатай өнгөрөөх зорилгоор л тоглодог байсан ч жилээс жилд ур чадвар нь ахиж, удалгүй ахлах сургуулийнхаа шигшээ багт тоглоx болсон байна.

Энэ үеэс эхлэн тэрээр хотдоо өөрийнхөө нэрийг таниулж эхэлсэн бөгөөд ахлах сургуулиудын аварга шалгаруулах тэмцээнд гялалзаж, Их сургуулийн дасгалжуулагчдын хараанд өртжээ. Улмаар 2011 онд NCAA-н 3 дугаар дивизоны Чепмений Их сургуулийг сонгож, 4 жилийг үдсэн байна.

Төгсөх жилийнхээ улирал буюу 2014-15 оны улирал нийт 27 тоглолтод оролцоxдоо дунджаар 27.5 минутыг талбайд өнгөрүүлж, 8.6 оноо, 5.5 самбар, 1 оновчтой дамжуулалтыг дундчилсан. Их сургуулиа төгсөөд эх орондоо эргэн ирж, 2016 оноос Вьетнамын дээд лигт тоглож эхэлсэн байна. Анхны улиралдаа Хо Ши Мин Вингс багт тоглож дабл-дабл дундчилсан бөгөөд тус улирлаас эхлэн Вьетнамын сагсан бөмбөгийн дээд лиг эрчимтэй сэргэж, улсынхаа хамгийн олон үзэгчтэй лиг болсон юм.

Ташрамд сонирхуулахад, Вьетнам улсын Засгийн газар Ерөнхий боловсролын хөтөлбөртөө сагсан бөмбөгийн спортыг хичээл болгон нэмэгдүүлсэн. Энэ нь тус улс сагсан бөмбөгийн спортыг бодлогын түвшинд хэрхэн дэмжиж байгааг бүрэн илтгэж байна. 

Хэдий 29 настай ч шигшээ багийнхаа ахлагч хэдийнээ болсон Justin Young өнгөрсөн зуны Зүүн Өмнөд Азийн наадамд 6 тоглолтод оролцоxдоо 5 оноо, 6 самбар, 3 оновчтой дамжуулалтыг дундчилсан. Статистик үзүүлэлт нь даруухан байгаагийн шалтгаан нь өнгөрсөн зуны Вьетнамын бүрэлдэхүүнд Харвардын их сургуулийг төгссөн, NCAA-н 1-р дивизонд 4 жил тоглосон Christian Juzang /NBA-н Юта Жазз багийн рүүкий Johnny Juzang-н төрсөн ах/ гэж авьяаслаг холбогч байсан. Харин энэ удаагийн бүрэлдэхүүнд нь Christian Juzang багтаагүй учраас довтолгоо болон хамгаалалтын гол ачаа Justin Young-гийн нуруун дээр ирэх нь ойлгомжтой.

Вьетнамын шигшээ багийн энэ удаагийн бүрэлдэхүүн тун залуу байгаа. Мөн ах дүү Juzang болон Оклаxома Сити Тандер багийн рүүкий Jaylin Williams тэргүүтэй Вьетнам гаралтай Америк залуучууд үндэсний шигшээ багийнхаа төлөө тоглоод эхлэвэл энэ улс тивдээ ширүүн өрсөлдөгч болох магадлал өндөр байгаа.