Украин, Орос аль аль нь Польшид болсон дэлбэрэлтэд хамааралгүй гэв

Польшийн Гадаад хэргийн яамнаас тус улсын Украинтай хиллэдэг Польшийн Пржеводув тосгонд дэлбэрэлт болсонтой холбогдуулан ОХУ-ын Элчин сайд Сергей Андреевийг нэн даруй тайлбар хийхийг шаардсан байна. Энэ тухай өчигдөр /2022.11.15/ мягмар гарагт Польшийн ГХЯ-ны сайтад мэдээлжээ.

ОХУ-ын зэвсэгт хүчин Украины нутаг дэвсгэр рүү " галлах" үеэр  ойролцоогоор 15.40 цагт Орост үйлдвэрлэсэн пуужин Польшийн Пржеводув тосгоны нутаг дэвсгэрт унасан байна. Мөн Люблин мужийн Хрубешовский дүүрэгт Польшийн хоёр иргэн амиа алдсан гэнэ. Тиймээс тус улсын Гадаад хэргийн сайд Збигнев Рау ОХУ-ын Элчин сайдыг дуудаж, нэн даруй дэлгэрэнгүй тайлбар өгөхийг шаарджээ.

Үүний зэрэгцээ Польшийн Ерөнхийлөгч  Дуда өөрийн твиттертээ. "Одоогоор бидэнд энэ пуужинг хэн хөөргөсөн талаар хоёрдмол утгагүй нотлох баримт алга. Мөрдөн байцаалтын ажиллагаа явагдаж байна. " гэж бичсэн аж.

Польшийн төрийн тэргүүний ажлын алба дэлбэрэлтийн улмаас хоёр хүн амиа алдсан болохыг баталжээ. Польш улс энэ үйл явдалтай холбогдуулан зэвсэгт хүчин, түүний дотор агаарын довтолгооноос хамгаалах хүчнийхээ бэлэн байдлыг нэмэгдүүлсэн гэж Ерөнхийлөгч Дуда гь онцолсон байна.

Польшийн Ерөнхийлөгч НАТО, АНУ, Украинтай энэ тухай ярьжээ

Польшийн Ерөнхийлөгч Дуда дэлбэрэлттэй холбогдуулан НАТО-гийн Ерөнхий нарийн бичгийн дарга Йенс Столтенберг, АНУ-ын Ерөнхийлөгч Жо Байден нартай утсаар ярьсан гэж Тамгын газраас нь мэдэгдэв.

Столтенберг "Хоёр хүн амиа алдсанд эмгэнэл илэрхийлж байна. НАТО нөхцөл байдлыг ажиглаж байгаа бөгөөд холбоотнууд зөвлөлдөж байна. Бүх баримтыг нягтлан тогтоох нь чухал" гэж твиттер хуудсандаа бичжээ.

Байден, Дуда нар дараагийн алхмуудыг уялдуулахаар тохиролцсон гэж Цагаан ордон мэдэгдэв. "Ерөнхийлөгч Байден Польшид болсон дээрх хэргийг мөрдөн шалгах ажиллагаанд АНУ-ын зүгээс бүх талын дэмжлэг, туслалцаа үзүүлэхээ мэдэгдэв. " гэж хэвлэлийн мэдэгдэлд дурджээ.

Ерөнхийлөгч Дуда Америкийн удирдагчтай ярилцсаны дараа Украины Ерөнхийлөгч Владимир Зеленскийтэй утсаар ярьжээ. "Би Польшийн Ерөнхийлөгч Анжей Дудатай ярилцлаа. Польшийн иргэдэд эмгэнэл илэрхийлье. Украин, Польш, бүх Европ, дэлхий нийтээрээ хамтдаа байх ёстой. " гэж Украины Ерөнхийлөгч твиттертээ бичжээ.

Их Британийн Ерөнхий сайд, Германы канцлер нарын зүгээс Польш улсад холбоотнууд дэмжлэг үзүүлнэ гэдгээ баталжээ.

Украины Гадаад хэргийн сайд Дмитрий Кулеба Польшид болсон дэлбэрэлтийн шалтгаан нь Украины зенитийн пуужин гэх "худал" мэдээлэл тараасан гэж Оросыг буруутгав.

Хариуд нь ОХУ-ын Батлан ​​хамгаалах яам бид Польшид болсон дэлбэрэлтэд хамааралгүй гэж мэдэгджээ.

 Эх сурвалж: DW