Сүмогийн дээд зиндаад түрүүгүй ч, дараах хоёр зиндааны түрүүг монголчууд авлаа

Мэргэжлийн сүмогийн 2022 оны сүүлийн тэмцээн Кюүшюү башё арваннэгдүгээр сарын 13-27-нд Японы Фүкүока хотын "Кokusai Center"-т боллоо. Ёкозүна Тэрүнофүжи өвдөгний бэртлийн улмаас энэ башёг өнжсөн бөгөөд манай сүмочид дээд зиндаанд түрүү хүртээгүй ч дараагийн хоёр зиндаанд түрүүлсэн. Жюүрёо зиндаанд Оошёома Пүрэвсүрэнгийн Дэлгэрбаяр сүүлийн өдөр Дайамамид ошидаши мэхээр унасан ч нэмэлт барилдаанд түүнтэй дахин барилдаж давснаар 11 даваа, 4 унаатай аваргалсан юм. Макүшитад Тамашоохо Эрдэнэбилэгийн Энхманлай 7 даваатай түрүү хүртсэн. Ингэхдээ манай сүмоч экс озэки Асанояамаг ялсныг дурдах нь зүйтэй болов уу. Монголчууд маань дээд гурван зиндаанд түрүүлэх боломж бүрэн дүүрэн байсан. Макүүчид сэкивакэ Хоошёорюү Сугаррагчаагийн Бямбасүрэн 11 өдрийн дараагаар 10 даваа, 1 унаатай тэргүүлж явсан ч сүүлийн дөрвөн барилдааныхаа гуравт нь өвдөг шороодсноор Эзэн хааны цомыг гардах боломжоо алдсан. 68 дахь ёкозүна Асашёорюүгийн төрсөн ахынх нь хүү Хоошёорюүд том сургамж, томоохон сануулга болсон башё боллоо.

Аваргыг эзгүйд арслангууд тааруу барилдсныг маэгаширагийн ес дэх бөх Аби хоёр ч нэмэлт барилдаанд ялалт авч 12 даваа, 3 унаатай макүүчид зиндаанд анх удаа түрүүлэв. Дээд зиндаанд манай бусад сүмочдоос комүсүби Кирибияма Б.Лхагвасүрэн 8-7 амжилттай цолоо хамгаалсан бол Тамаваши Б.Мөнх-Оргил 6-9, баруун жигүүрийн маэгаширагийн 2-оос хүч үзсэн Ичиножёо А.Ичинноров 4-11, барууны 10 дахь бөх Чиёошома Г.Мөнхсайхан, 14-өөс барилдсан Азүмарюү С.Тодбилэг тус 7-8 гэсэн амжилттай башёг өндөрлүүлэв.

Эх сурвалж: MGLsports.mn