Ихэр гавьяатууд АНУ-д Монголын багаа дэмжжээ

Чөлөөт бөхийн Дэлхийн цомын тэмцээн АНУ-ын Коралвиль хотод хоёр өдөр болж өчигдөр өндөрлөсөн. 1980-аад оны дунд үеээс 1990-ээд оны эхэн үе хүртэл Монголын чөлөөт бөхийн 74 кг-ын жинд олимп, тив дэлхийд эх орноо төлөөлж, дотооддоо зөвхөн хоорондоо л гол өрсөлдөгч мэт явсан, ихэр гавьяатууд Лодойн Эрхбаяр, Энхбаяр нар Сэм авгад Монголын бөхчүүдээ хоёр өдөр дэмжин суусан. Тэд хамтдаа насанд хүрэгчдийн Улсын аварга шалгаруулах тэмцээнд найм, “Интернациональ”, “Монгол говь” ОУТ-д 5 удаа түрүүлсэн байдаг. Гадаадын бусад олон улсын тэмцээнээс хүртсэн медалийн тоо ч олон.

1989 онд Швейцарийн Мартиньи хотод болсон чөлөөт бөхийн насанд хүрэгчдийн ДАШТ-д Л.Энхбаяр оролцох байсан ч тэмцээний өмнөхөн бэлтгэлд дээр бэртэл авсан. Ингээд Л.Эрхбаяр нь тэмцээний цаг тулсан учраас ихрийнхээ паспортоор оронд нь Швейцарийг зорьж дэлхийн шилдгүүд дундаас хүрэл медальтай эх орондоо ирж байсан сонирхолтой, бахархалтай түүхийн эзэд.

Л.Эрхбаяр нэлээд хожуу дэлхийгээс медаль авчирснаас хойш 17 жилийн дараа буюу 2006 онд төрдөө үнэлүүлж Монгол Улсын гавьяат тамирчин болсон. Тэгвэл “Бээжин-1990” Азийн наадмын мөнгө, 1991 оны Азийн аваргын алт, 1989, 1992 оны хүрэл медальт Энхбаяр нь энэ жил улсын баяр наадмын өмнөхөн гавьяат тамирчин цолоор энгэрээ мялаалгасан.

1964 оны алдарт луутнуудын томоохон төлөөлөл, Ховд аймгийн Дарви сумын харьяат, тэд Монгол үндэсний бөхийн түүхэнд хоёулаа улсын начин цолд хүрсэн ховор тохиолдол. Эрхбаяр 1989 оны улсын баяр наадмаар дархан аварга Д.Дамдингаар тав давж начин болсон. Тэгвэл хойтон жилийн наадмаар тэднийг тав дээр томчууд авалгүй хооронд нь тунааж Энхбаяр нь ахаараа давж улсын начин цолны эгнээнд багтаж байв.