Япон улс 2024 онд далайн 6000 метрийн гүнээс газрын ховор элемент олборлоно

Нихон Кэйзай Шимбун (Nikkei) сонин өчигдрийн дугаартаа, Японы Засгийн газар 2024 он гэхэд Токио хотоос зүүн өмнө зүгт 1900 километрийн зайд орших Огасавара арлуудын Минами Торишимгийн ойролцоох далайн гүнээс газрын ховор элемент олборлохоор төлөвлөсөн тухай мэдээлжээ.

Тус мэдээнд дурдсанаар Японы Засгийн газар Минами Торишима орчмын 5000-6000 метрийн гүнд далайн ёроолд буй газрын ховор элементийг олборлох технологийг боловсруулж эхэлсэн гэв.

Энэ сарын эхээр парламентаар тодотгол хийсэн хоёр дахь удаагийн нэмэлт төсөвт газрын ховор элементийн судалгаатай холбоотой 6 тэрбум иен төсөвлөсөн байна.

Өнгөрсөн намар 2470 метрийн гүнээс хурдас сорох туршилтыг амжилттай хийжээ.

Минами Торишимагийн ойролцоох далайн ёроолд газрын ховор элемент элбэг байдаг нь 10-аад жилийн өмнө тогтоогдож байсан боловч холбогдох судалгааг өнөөг хэр нь нухацтай хийгээгүй байсан юм.

Газрын ховор элемент нь ухаалаг утас, компьютер, цахилгаан автомашин зэрэг электрон төхөөрөмж үйлдвэрлэхэд зайлшгүй шаардлагатай эрдэс бодис билээ. Харин Япон улсын газрын ховор элементийн салбар бараг бүхэлдээ импортод түшиглэдэг бөгөөд 60 орчим хувийг Хятадаас авдаг аж.

Японы Засгийн газар 16-ны өдөр хуралдсан ээлжит бус хуралдаанаар “Үндэсний аюулгүй байдлын стратеги”-днэмэлт оруулж “Нийлүүлэлтийн сүлжээг бэхжүүлэхийн тулд газрын ховор элемент зэрэг чухал түүхий эдийн тогтвортой нийлүүлэлтийг хангах” талаар тусгаж өгсөн байна.