Хятад, Австрали улсууд харилцаагаа сайжруулахыг хичээж байна

12-р сарын 21-нд Хятад улсын дарга Ши Жиньпин Австралийн амбан захирагч Хурли, Ерөнхий сайд Албанизе нартай хоёр орны хооронд дипломат харилцаа тогтоосны 50 жилийн ойг тэмдэглэж, харилцан баярын цахилгаан илгээжээ.

Мөн өдөр Хятад, Австралийн гадаад хэргийн сайд нар Бээжинд Хятад Австралийн гадаад харилцаа болон стратегийн 6 дахь удаагийн яриа хэлцэл хийж, хоёр орны харилцааг сайжруулах талаар олон нийтлэг ойлголтод хүрсэн байна. Мөн Хятад, Австралийн харилцаа нь хоёр орны иж бүрэн стратегийн түншлэлийн харилцаанд нийцэж, харилцан хүндэтгэж, эрх тэгш, харилцан ашигтай байж, санал зөрөлдөөнөө сайтар хянасан байх ёстой гэдэгт хоёр тал санал нэгдэв.

Энэ бол Хятад, Австралийн харилцааг сайжруулах, хөгжүүлэх сүүлийн үеийн хамгийн тод хүчин чармайлт юм. Өнгөрсөн сард Ши Жиньпин дарга, Ерөнхий сайд Албанезе нар Индонезийн Бали аралд уулзаж, хоёр орны харилцааг сайжруулах чиглэлийг тодорхойлсон бол энэ удаад Австралийн ГХЯ-ны сайд гурван жил гаруйн дараа Хятадад айлчилж, дөрвөн жил гаруй тасалдсан Хятад Австралийн дипломат болон стратегийн яриа хэлэлцээний механизмыг сэргээсэн нь хоёр орны удирдагчдын тохиролцсон нийтлэг ойлголтыг хэрэгжүүлэх чухал алхам болов. Хоёр тал дипломат харилцаа тогтоосны 50 жилийн ойг тохиолдуулан Австралийн Гадаад хэргийн сайд Хятадад айлчилж байгаа нь хоёр орны харилцааг тогтворжуулах шинэ алхам гэж “Австралийн санхүүгийн тойм” сонин тэмдэглэжээ.

Өнгөрсөн хэдэн жилд АНУ-ийн дэмжлэгтэйгээр Австралийн зарим улс төрчид Хятадтай харилцан ашигтай, найрсаг хамтын ажиллагаа явуулах прагматик шугамаас татгалзаж, АНУ-ыг дагаж Хятад улсад дарамт үзүүлэх болсон. Хятадын харилцаа холбооны компаниудыг Австралийн 5G сүлжээний бүтээн байгуулалтад оролцохыг хориглохоос эхлээд "Хятадын заналхийлэл" гэгчийг хөөрөгдөх, АНУ-ын "Энэтхэг Номхон далайн стратеги" гэгчтэй хамтран ажиллах, аюулгүй байдлын гурван талт түншлэлийн механизмд оролцох гэх мэтээр Австралийн зарим улс төрчдийн стратегийн алсын хараагүй буруу зан авир нь Хятад, Австралийн харилцаанд урьд өмнө байгаагүй хүндрэл учруулсан юм.

Харин энэ оны тавдугаар сард Австралийн Хөдөлмөрийн Нам засгийн эрхэнд гарсны дараа хоёр орны харилцааг сайжруулж, хөгжүүлэх хүсэлтэй байгаагаа удаа дараа мэдэгдсэн. Австралийн нийгмийн бүх давхарга ч шинэ засгийн газартаа Хятадтай харилцаагаа сайжруулахыг уриалсан бол үүнд Хятад улс нааштай хариу өгсөн.

Одоохон Хятад, Австралийн харилцаа сорилттой хэвээр байна. тиймд хоёр тал уг санаа зорилтоо эргэн харж, дипломат харилцаа тогтоосны 50 жилийн ойг тэмдэглэн өнгөрүүлэх арга хэмжээгээр боломж болгож, удирдагчдын тохиролцсон чухал ойлголтуудыг хамтран хэрэгжүүлэх ёстой. Ямартай ч Хятад, Австралийн эрүүл, тогтвортой харилцаа нь хоёр орны ард түмний язгуур ашиг сонирхолд нийцэх төдийгүй Ази Номхон далайн бүс нутаг болон дэлхийн энх тайван, тогтвортой байдал, хөгжил цэцэглэлтийг ахиулахад тустай юм.