Т.Бадамжунайг Х.Нямбаатар "Ерөнхий сайд дуудаж байна" гэж хуурч барьж өгчээ

Эрх баригч хүчнийхэн улс төрийн ээлжит шоугаа УИХ-ын гишүүн асан Т.Бадамжунайг Филиппин улсын Сэбү хотоос барьж авчирснаар хийж байна. Улаанбаатар хотын ерөнхий менежер, УИХ-ын гишүүн, Хүнс, хөдөө аж ахуй, хөнгөн үйлдвэрийн сайд асан, өдгөө 67 настай Жунай ноёнтныг алс холоос барьж авчирснаар чухамхүү МАН-д ард түмэн нэмэх оноо өгөх эсэх нь эргэлзээтэй. Учир нь ард иргэд улам хэрсүү болсон. Жунай ноёнтноор сор залж шоу хийхээс илүү инфляци, өр, зээлийн асуудал айл бүрийн хаалгаар аль хэдийнэ ороод ирчихсэн учраас арга ч үгүй биз. Гэвч "Т.Бадамжунай 2018 оны арванхоёрдугаар сарын эхээр Замын-Үүд боомтоор "УАЗ-469" машинаар хил нэвтрэн зугтлаа. Хил давахаасаа өмнө Сүхбаатар дүүрэг дэх "Алтай констракшн"-ы оффис болох Твин тауэрт байдаг өрөөндөө хоёр сая ам.доллар бэлтгэчихсэн байжээ" гэх дуулиан тухайн үед дэгдэж байсан. Жунай ноёнтонтой холбоотой дуулиан хэвлэл, сошиалаар нэг хөвөрсөн нь өдгөөгийн Ерөнхий сайд Л.Оюун-Эрдэнэ, Хууль зүй, дотоод хэргийн сайд Х.Нямбаатар тэргүүтэй "Шударга 5" МАНАН бүлэглэл, тэр дундаа М.Энхболд нарын эсрэг "60 тэрбумын хэрэг" улс төрийн акци өрнүүлж байсантай давхацсан нь санамсаргүй тохиолдол биш. Учир нь Т.Бадамжунай бол хотын фракцийн гол төлөөлөл... "Шударга 5" хотын фракцийнхны эсрэг дайралтаа ширүүсгэж байх үед буюу одоогоос таван жилийн өмнө хилийн чинадыг зорьсон Т.Бадамжунайг ийнхүү авчрах болсон нь яг ямар учиртай вэ. Ирэх сонгуулийг угтсан шоу юу... Түүнийг яаж урхинд оруулав... Зарим эх сурвалжийн мэдээлснээр, Филиппин улсад амар жимэр амьдарч байсан Т.Бадамжунайн хүүхдүүдтэй сайд Х.Нямбаатар уулзаж "Ерөнхий сайд дуудаж байна" гэж аавтай нь утсаар яриад урхиндаа лав оруулжээ. Т.Бадамжунайн хувьд ч "Хүний газар удлаа. Одоо больё, очъё" гэдгээ хэлсэн аж. Эндээс харвал, Х.Нямбаатар сайд Филиппиний Сэбү хотод өөрөө очиж хүүхдүүдээр нь дамжуулж Т.Бадамжунайг хуурч холбоо бариад хууль хяналтынханд барьж өгчээ. Тиймээс Х.Нямбаатар сайд өнөөдөр Т.Бадамжунайг гадаадаас өөрийн биеэр авчирч сүр хүчээ харуулж, сошиалаар нэг ПР-дах нь тодорхой. Ши Жиньпин Хятадын дарга болсныхоо дараа "Үнэгний ав" ажиллагааг гадаад, дотоодод өрнүүлсэн. Үндэслэлгүй хөрөнгөжсөн, авлигач гэгдэх нөхдүүдийг гадаадаас онгоцоор авчирч буй гэрэл зургуудаар ч улс төрийн суртал ухуулгаа хүчтэй хийж, Бо Силай зэрэг өрсөлдөгчдөө шоронд хийж Хятадын "Хаан" болсон нь Ши Жиньпиний эрх мэдлээ бататгах улс төр байв. Тэгвэл Ерөнхий сайд Л.Оюун-Эрдэнэ, сайд Х.Нямбаатар нар Ши Жиньпиний замналаар замнаж, "Шувуу ажиллагаа"-ныхаа хүрээнд Жунай ноёнтныг сүр дуулиантай авчирч шоудаж буй нь энэ. Үнэндээ Жунайг авчрах нь хэнд хэрэгтэй вэ... Т.Бадамжунай гэдэг нөхөр ямар гэмт хэрэг үйлдэв. Тухайн үед хэвлэлүүд түүний талаар Жижиг, дунд үйлдвэрийг хөгжүүлэх сан, "Мах, сүүний анхдугаар аян"-ы төсөв мөнгөнөөс олон тэрбумыг хувьдаа ашигласан байж болзошгүй хэрэгт шалгахаас нь өмнө Т.Бадамжунай гадаад руу зугтжээ. Т.Бадамжунай тэргүүтэй хүмүүсийг 2012 онд хуучнаар УМБГ-ын Эдийн засгийн гэмт хэргийг мөрдөх хэлтсээс ЖДҮХС-аас 500 сая төгрөг завшсан гэх хэргээр шалгаж байсан ч замхрав бололтой" гэж мэдээлж байжээ. Харин Т.Бадамжунайг 2018 онд хэн зугтаалгасан бэ гэдэг ч сонин. Учир нь Жунай зугтсан биш, Жунайг зугтаалгасан гэвэл үнэнд нийцэх биз. Алдарт "60 тэрбумын хэрэг"-т ороогдож байсан М.Энхболд нар түүнд тусалсан уу, аль эсвэл эрх баригч хүчин дэх өөр бүлэглэл түүнийг хил даван дайжихад тусалсан уу... Энэ бүхэн "Шувуу" баригчдын суртал ухуулгын үеэр тодорхой болж мэднэ... Үгүй ч байж магадгүй.

                                                                                                                                                     Д.Гал