Глеб Каракулов: Путиний мэдээлэл авдаг гол эх үүсвэрүүд нь тагнуулын байгууллагын тайлан болон Оросын төв телевиз

Оросын бизнесмэн Михаил Ходорковскийн байгуулсан эрэн сурвалжлах сэтгүүлзүйн “Досье Центр” сайт саяхан ОХУ-ын ерөнхийлөгч Владимир Путиний дэргэд олон жил ажилласан мэргэжилтэнтэй ярилцлага хийжээ.

Уг ярилцлагын эзэн Глеб Каракулов бол Холбооны Хамгаалалтын Албанд байхдаа Путиний харилцаа холбооны асуудлыг хариуцдаг байсан хүн юм.Тэрээр 2009 оны аравдугаар сараас хойш ОХУ-ын ерөнхийлөгчийг 180 гаруй удаа гадаад айлчлалд дагалдахдаа бүх харилцаа холбоо, мэдээллийн урсгалыг хянаж, зохицуулдаг байжээ. Харин өнгөрсөн оны аравдугаар сард Путинийг Казахстанд айлчлах үеэр Каракулов гэр бүлийн хамт Турк улс руу зугтсан аж. Путинийг “дайны гэмт хэрэгтэн” болж байгааг ойлгосныхоо дараа эх орноосоо дүрвэхээр шийдсэн гэж Каракулов тайлбарлажээ. “Би өнгөрсөн бүх хугацаанд түүнийг гар утас барьсан байхыг огт хараагүй. Тэр гар утас, интернэт огт хэрэглэдэггүй. Зөвхөн ойрын хүрээний хүмүүсээсээ мэдээлэл авдаг. Өөрөөр хэлбэл, мэдээллийн вакуум дотор амьдардаг” гэж тэр ярьсан байна.

Путиний мэдээлэл авдаг гол эх үүсвэрүүд нь тагнуулын байгууллагын тайлан болон Оросын төв телевизийн суваг байдаг гэнэ.“Ерөнхийлөгч байгаа газар бүрдээ Оросын телевиз үзэх боломжоор хангахыг шаарддаг” гэж Каракулов ярьжээ. Ерөнхийдөө Путин гадаад ертөнцөөс бүрэн тусгаарлагдаж, ихэнх цагийг өөрийн ордонд өнгөрүүлдэг ба “амь насандаа аюул учрахаас маш их болгоомжилдог нь сэтгэцийн эмгэгийн хэмжээнд хүрсэн” тухай тэр ярьсан юм.

Глеб Каракулов экс боссынхоо зөвхөн харилцаа холбоо, мэдээллийн хэрэглээг яриад зогсолгүй өөр өргөн хүрээнд дэлгэрэнгүй ярилцлага өгсөн байна.

                                                                                                                                           Г.Амарсанаа