Нохой зассан хүндээ ЯНАГ!

         1.

Боловсролын ерөнхий хуулийн шинэчилсэн найруулгын төсөлд англи хэлийг үндсэн гадаад хэлээр суулгаж өгсөн нь МАН-ын гишүүдийг матрын нулимс унагахад хүргэв.
Н.Учралын “Англи хэлийг I ангиас заах нь үндэсний уламжлалд сөрөг, Ц.Даваасүрэнгийн “Оросоос үлдсэн элит сургалтын тогтолцоо хамгийн сайн нь. Агуулга, стандартыг нь өөрчилж болохгүй”, Б.Энх-Амгалангийн “Монгол хүүхдүүд заавал англи хэл сурах албатай юу” гэх үгнүүдийн цаана үндэсний эрх ашгаас илүү өөрсдийнх нь жижиг, “өрөөлийн” том эрх ашиг нуугдаж буй нь тэнэг хүнд ч ойлгомжтой. Тэр тусмаа монгол дархлаагаа бодсон монгол хүний амнаас ийм үг унахгүй, Монголын ирээдүй “…..Тэртээ уулыг өнгөрвөл айлгүй гэж бодож, тэнгэрийн хаяанаас цааш газаргүй гэж сэтгэсээр, түмэн хэргээс хоцорч, дэлхийн боловсролоос гээгдсэн” хуучин хүү байх нь үндэсний аюулгүй байдалд илүү аюултай. Эрдэм боловсролтой эрүүл монгол хүн Монголын баялаг гэх утгаараа.

Н.Учралын тухайд нэгдүгээр ангиас нь англи хэл заадаг “Их засаг” сургуулийнх нь бизнест сөргөөр нөлөөлнө гэдгээс эмээсэн нь бараг үнэний ортой байх. Хамгийн аюултай нь, Ц.Даваасүрэнгийн “Оросын тогтолцоо хамгийн сайн нь” гэх пропаганда. Монгол хүүхдүүдэд англи хэл заахын эсрэг байгаа нь  хүмүүс голдуу экс Ерөнхийлөгч Х.Баттулгын дэмжигчид гэхээр Л.Энх-Амгалангийн өргөн барьсан хуулийн төслийг боловсрол талаасаа ч, бодлого талаасаа ч яаралт батлах шаардлагатай. Тэгж байж Монголын залуус дэлхийн боловсролтой хөл нийлүүлнэ.

2.

Орос хэлээр ярьдаг хилийн чанад дахь бүх хүнийг “эх орон нэгтэн” буюу “нэг улсын, нэг нутгийн хүмүүс” гэж тооцох асуудал Төрийн Думаар нь яригдах хэмжээнд өндөр авсан агаад 2022 онд Оросын Гадаад хэргийн сайд С.Лавров Монголд айлчлах үеэр Монгол, Оросын хамтарсан ерөнхий боловсролын сургууль байгуулах ажлыг эрчимжүүлэхээр тохиролцсон тухай Б.Батцэцэг сайд сэтгүүлчдэд мэдээлж байв. ОХУ-ын Элчин сайдын яамнаас Монголын хүүхэд залуус руу чиглэсэн пропаганда үе, үе хийдэг. Өнгөрсөн хавар гэхэд Монголын ЕБС-ийн 150 гаруй сурагч, багш нарт дайныг сурталчлах Эр зоригийн хичээлийг зохион байгуулсан тухай мэдээлэл цацагдаж, үүнийг БСШУ-наас үгүйсгэж байлаа. Гэсэн хэдий ч тус улсын зүгээс Монголын боловсролын салбарт анхаарлаа хандуулсан хэвээр байгаа нь РЦНК-аас зохион байгуулж буй арга хэмжээнүүдээс нь илэрхий харагддаг. Хэдийгээр Л.Энх-Амгалан сайд “Дайн сурталчлах хуулиар хориотой. Ийм бүдүүлэг, дээрэнгүй, бохир үйл ажиллагаа явуулсан этгээдүүдэд хуулийн хариуцлага хүлээлгэх ёстой. Бид тусгаар тогтносон, ардчилсан Монгол улсын иргэд. Бидний үр хүүхдүүдийн тархийг элдэв бохир суртал ухуулгаар "угаах" аливаа үйлдлийг таслан зогсоох ёстой" гэж байр сууриа илэрхийлсэн ч үнэндээ оросуудын зүгээс монголчуудын үгийг гөлөөг ч гэж тоож байгаагүй. Ямар сайндаа л өмнөх Элчин сайд И.Азизов Эрхүүд Монголын засаглалыг өөрчлөх тухай ил цагаан яриад явж байх вэ дээ.

3.

Улаанбаатарт өчигдөр Оросыг дэмжсэн, Оросыг эсэргүүцсэн хоёр өөр жагсаал болсон. Оросын түрэмгийллийг дэмжигчид нь цагдаагийн хамгаалалт дор, Оросын түрэмгийллийг эсэргүүцэгчид нь цагдаагийн хяналт дор үзэл бодлоо илэрхийлсэн нь олон нийтийн сүлжээнд талцал үүсгээд байна.
Дэлхий сохор биш. Тиймээс Монголын цагдаагийн жагсагчдад гаргаж буй хоёр өөр хандлага нь Монголын гадаадад харилцаанд сөргөөр нөлөөлж, улс төр, эдийн засгийн хувьд бид жинхэнээсээ хадны дунд хавчуулагдсан халиуны зулзага болж мэднэ. Тэнд Төрийн тэргүүн нь дэлхийн 203 орны оролцсон түүхэн үйл явдалд тусгаар улсаа төлөөлж явахад энд цагдаа нь Путины тавдугаар армид үйлчлэх нь шившиг юм. Нохой зассан хүндээ янаг гэдэг. Гучин долоон оны их хэлмэгдүүлэлтийн үеэр
Монголын 37 мянган хүнийг баривчлан шийтгэснээс 27 мянга гаруй нь буудуулж амь насаа алджээ.

Халуун итгэл цөхөрсөн
Хатан зүрх шархирсан
Хар дарсан жилүүдийг
Хамаг Монголчууд мартлаа гэж үү?!.