The Hu хамтлагийн “Rumble Of Thunder: Deluxe” цомог зургаадугаар сарын 30-наас худалдаанд гарна

The Hu хамтлаг өнгөрсөн онд гаргасан “Rumble Of Thunder” цомгийнхоо удахгүй гарах “люкс” хувилбарын шинэ клип, шинэчлэгдсэн дуунуудаа цацаж эхэлсэн нь олны анхаарлыг татаад буй. Саяхан тус хамтлаг ардын бие биелгээг магтан дуулсан “Бий биелгээ” дууныхаа акустик хувилбарыг Youtube хуудаснаа байршуулжээ.

Зургаадугаар сарын 30-наас худалдаанд гарах “Rumble Of Thunder: Deluxe” цомогт үндсэн цомгийн дуунуудаас гадна нэмэлт долоон дуу багтах бөгөөд тэдгээрийн дөрөв нь акустик найруулга, гурав нь дэлхийн нэртэй уран бүтээлчидтэй хамтран бичүүлсэн дуу аж. The Hu хамтлаг Америкийн алдарт “Alice In Chains” рок хамтлагийн дуучин Уильям Дювальтай хамтран “This Is Mongol”, мөн “System of a Down” хамтлагийн дуучин Серж Танкян, “Bad Wolves” хамтлагийн дуучин DL нартай хамтран “Black Thunder” дуугаа цацаад байгаа юм. 

 The Hu хамтлагийн тухайд сошиалд нийт 329 сая гаруй, “Youtube” хуудсанд 300 сая гаруй хандалт аваад байгаагаас гадна, “Billboard”-ын шилдэг рок цомгуудын жагсаалтад хоёр цомог нь бичигдэж, аялан тоглолтынх нь тасалбарууд дэлхий даяар борлогдож дууссан байна.