Ч.Ундралын ахалсан КУЗ-ийнхөн Каннын наадамд явахдаа төсвөөс 500 саяыг гаргуулжээ

    Соёл урлагийн салбарынхан цалингаа нэмэгдүүлэхээр эсэргүүцлээ илэрхийлсэн өдрүүд үргэлжилж байна. Тэгвэл байгуулагдаад гуравхан жилийн нүүр үзэж байгаа  Кино урлагийн зөвлөлийн ажлын албаныхан хөрөнгө мөнгөөр "туйлж" байгаа мэдээллийг хүргэе.

Тус Зөвлөл нь өдгөө хотын төвд нэлээд өндөр өртөгтэй гэх оффист тухалж, гадаад орнуудаар аялангаа "ажиллаж" буй. Зөвхөн дөрөв тавдугаар  сард л гэхэд Каннын кино наадамд оролдохдоо 300 шахам сая төгрөг зарцуулсан байна.

Тодруулбал, дижитал каталог, дэлгэц түрээслэх төлбөрт 9 сая, үйл ажиллагааны байршлын түрээс 65 сая төгрөг, олон Улсын сэтгүүл, сайтад мэдээ нийтлэхэд 20 сая төгрөг гээд нийт 100 гаруй сая төгрөг зарцуулсан байна. Мөн Кино урлагийн зөвлөлийн даргаар Ч.Ундрал, жүжигчин Цогтгэрэлийн охин Анударь, Д.Давааням, Б.Оргилмаа нарын ЕСӨН хүний зардал томилолтод нийт 150 гаруй сая төгрөг зарцуулсан байна.

Эдгээр зардал нь Соёлын яамнаас гарсан бөгөөд Соёлын сайдын А/42 тоот тушаал гарган Каннын кино наадамд Монголын кино уран бүтээлчдийг оролцуулахад зориулан Кино урлагийн зөвлөлийн ажлын алба руу 501 сая төгрөг шилжүүлсэн байна. Гэвч энэхүү үйл ажиллагаад яг кино уран бүтээлчид оролцож чадсан уу гэх асуулт анхаарал татаж байна.

Хөрөнгө мөнгөний асуудалтай, хэдэн театрын уран бүтээлчид нь ажлаа хаяхад хүрсэн гээд хатуухан цаг үеийг туулж яваа Соёлын яам Кино урлагийн зөвлөлийнхөнг олон улсын кино наадамд оролцуулах нэрээр багагүй хэмжээний хөрөнгө зарцуулсаар байна.