“Эрдэнэт үйлдвэр”-ийн ерөнхий инженер П.Түвшинжаргалын гэрээс хоёр тэрбум төгрөг олдож, түүнийг ажлаас нь чөлөөлөн АТГ-аас шалгаж байна

      Төрийн өмчит үйлдвэрүүдийг тонож, саалийн үнээ шиг хуу шувтардаг тэрбумтан дарга нарын жагсаалт хэдэн арван боть болно. Тэр дундаа “Эрдэнэт үйлдвэр”  ТӨҮГ-аас “төрсөн” тэрбумтан Монголоор дүүрэн байна. Хамгийн сонгодог жишээ нь, “Эрдэнэт үйлдвэр”-ийн Ерөнхий захирлаар нь ажиллаж байсан Х.Бадамсүрэн. Тэр хөлжиж, “хөлжүүрхэж” аваад, тэрбумтан сэтэртэй даргын сэнтийгээсээ буусан.  Угтаа тус үйлдвэрээс мэргэжлийн уурхайчин төрөх атал тэрбумтан тодроод байдаг нь эмгэнэлтэй.

“ЭРДЭНЭТ ҮЙЛДВЭР”-ИЙН ЕРӨНХИЙ УУРХАЙЧИН П.ТҮВШИНЖАРГАЛЫН ГЭРЭЭС ХОЁР ТЭРБУМ ТӨГРӨГ ОЛДЖЭЭ

“Эрдэнэт үйлдвэр”-ээс “төрсөн” тэрбумтны цувааг Үйлдвэрийн бодлогын газрын Ерөнхий уурхайчин П.Түвшинжаргал үргэлжлүүлжээ. Авлигатай тэмцэх газрын мөрдөгчид П.Түвшинжаргалын гэрээс хоёр тэрбум төгрөг олж, 48 цаг цагдан хорьж, шалгаж эхэлсэн талаар эх сурвалж мэдээлээд байна. П.Түвшинжаргалыг хууль хяналтын байгууллагаас шалгаж эхэлсэн даруйд “Эрдэнэт үйлдвэр”-ийн Ерөнхий захирал Г.Ёндон тушаал гаргаж, үүрэгт ажлаас нь түдгэлзүүлжээ.

Эрх мэдэл, албан тушаалын байдлаа урвуулан ашиглаж, өөртөө давуу байдал олгосон, бусдаас хахууль авсан гэх үндэслэлээр П.Түвшинжаргалыг АТГ-аас шалгаж байгаа гэнэ. П.Түвшинжаргалыг бусдаас их хэмжээний хахууль авсан байж болзошгүй баримт, өргөдөл хууль хяналтын байгууллагад ирж, шалгаж эхэлжээ.

“П.ТҮВШИНЖАРГАЛЫН ЭХНЭР БОЛОХ “ЭРДЭНЭТ” ДУУ БҮЖГИЙН ЧУУЛГАД АЖИЛЛАДАГ МУСТА Н.НЯМСҮРЭНГ ШАЛГАЖ БАЙГАА”

      Энэ талаар эх сурвалж мэдээлэхдээ “Эрдэнэт үйлдвэр”-ийн Ерөнхий уурхайчин П.Түвшинжаргал гэрээс нь олдсон хоёр тэрбум төгрөгийн эх үүсвэрээ тайлбарлаж чадахгүй байгаа гэнэ лээ. Ийм учраас 48 цагийн хугацаатай цагдан хорьж, батлан даалтад сулласан гэсэн. Одоогоор гадуур байцаагдаж, шалгагдаж байгаа. Тодруулбал, АТГ-ын мөрдөгчид Орхон аймагт ажиллаж, хэд хэдэн хүний гэр болон албан өрөөнд нэгжлэг хийсэн. Энэ шалгалтын хүрээнд П.Түвшинжаргалын гэрээс их хэмжээний валют олдсон юм байна лээ. Эрх мэдэл, албан тушаалын байдлаа урвуулан ашиглаж, компаниудаас хахууль авсан байж болзошгүй байгаа гэнэ. Үүнийг нь хууль хяналтын байгууллага шалгаад тогтоох байх. Мөн АТГ-аас П.Түвшинжаргалын эхнэр болох Н.Нямсүрэн гэх эмэгтэйг шалгаж байгаа юм билээ. Эхнэр нь “Эрдэнэт” дуу бүжгийн чуулгад ажилладаг. Соёлын тэргүүний ажилтан цолтой дуучин бий” гэлээ.

П.ТҮВШИНЖАРГАЛЫГ АЖЛААС НЬ ЧӨЛӨӨЛЖЭЭ

“Эрдэнэт үйлдвэр”-ийн Үйлдвэрийн бодлогын газрын Ерөнхий уурхайчин П.Түвшинжаргалыг ажлаас нь чөлөөлж, оронд нь өөр хүн томилсон гэнэ. Эх сурвалжийн бидэнд өгсөн мэдээллээр “П.Түвшинжаргалыг гэм буруутай эсэхийг тогтоох хүртэл ажлаас нь түдгэлзүүлсэн. Өөрөөр хэлбэл, шүүхээр гэм буруутай эсэх нь тогтоогдож байж дараагийн арга хэмжээг авна. П.Түвшинжаргал гэм буруугүй нь тогтоогдвол буцаад ажилдаа томилогдох боломжтой” гэлээ.

Бид энэ талаар “Эрдэнэт үйлдвэр”-ийн нэгдүгээр орлогч даргаас тодруулахад “Ерөнхий уурхайчин П.Түвшинжаргалыг ажлаас нь чөлөөлсөн. Чөлөөлөөд удаж байна. Ажиллахгүй байгаа шүү дээ. Ямар шалтгааны улмаас ажлаас нь чөлөөлснийг мэдэхгүй. Дэлгэрэнгүй мэдээлэл өгөх боложмгүй” гэлээ.

ГЭРЭЭС НЬ ХОЁР ТЭРБУМ ТӨГРӨГ ОЛДСОН “ЭРДЭНЭТ ҮЙЛДВЭР”-ИЙН ЕРӨНХИЙ УУРХАЙЧИН П.ТҮВШИНЖАРГАЛ 303 САЯ ТӨГРӨГИЙН ХУРДАН УДМЫН АДУУ, 700 САЯ ТӨГРӨГИЙН ОРОН СУУЦТАЙ

      Гэрээс нь их хэмжээний мөнгө олдож, албан тушаалаасаа чөлөөгдөн АТГ-т шалгагдаж байгаа П.Түвшинжаргалын хөрөнгийг танилцуулж байна. Тэрбээр 2019 онд “Эрдэнэт үйлдвэр”-ийн Үйлдвэрийн бодлогын газрын Ерөнхий уурхайчингаар томилогджээ. Тус албан тушаалд томилогдохдоо буюу 2019 онд хөрөнгө орлогын мэдүүлгээ дараах байдлаар өгч байжээ.

2019 онд: П.Түвшинжаргалын гэр бүлийн орлого нь 20 сая төгрөг, жилийн нийт орлого нь 96 сая төгрөг байжээ. Амины хоёр орон сууц, зуслангийн байшин нэг, авто зогсоол гурав, авто гарааш нэг гэж мэдүүлсэн байна. Харин эдгээр үл хөдлөх хөрөнгөө 629 сая төгрөгөөр үнэлжээ. Мөн тэрбээр 155 сая төгрөгөөр үнэлэгдэх Lexus, 570-, Toyota, Crown машинтай гэсэн байна. Түүнчлэн 300 сая төгрөгөөр үнэлэгдэх хурдан удмын 10 адуутай гэжээ. Үүгээр ч зогсохгүй эзэмших эрхийн хоёр, өмчлөх эрхийн хоёр газартай гэж мэдүүлсэн бөгөөд 358 сая төгрөгөөр үнэлсэн байна. 205 сая төгрөгийн үнэт эдлэлтэй, 8.5 сая төгрөгийн хадгаламжтай байжээ. Худалдаа хөгжлийн банк, Голомт банканд 98 сая төгрөгийн өртэй, бусдаас 127 сая төгрөгийн авлагатай гэж мэдүүлсэн байна. Эрх, Патент, тусгай зөвшөөрөл, хувьцаа, хөрөнгө оруулалт байхгүй гэжээ.

2020 онд: Харин “Эрдэнэт үйлдвэр”-ийн Үйлдвэрийн бодлогын газрын Ерөнхий уурхайчингаар томилогдсоноос нэг жилийн дараа хөрөнгө нь ингэж өөрчлөгдсөн байна.

Тухайлбал, гэр бүлийн орлого нь 215 сая буюу өмнөх оныхоос арав дахин нэмэгджээ. Харин өөрийнх нь орлого 150 сая төгрөг болсон байна. Амины хоёр орон сууц, зуслангийн байшин нэг, авто зогсоол хоёр гэж мэдүүлсэн байна. Эдгээр үл хөдлөх хөрөнгөө 756 сая төгрөгөөр үнэлжээ. Өөрөөр хэлбэл, нэг зогсоол, гараашаа зарсан ч үнэлгээ нь өмнөх оныхоос 120 гаруй сая төгрөгөөр нэмэгдсэн байгаа юм. Машин, газар, үнэт эдлэл хэвээрээ байх ажээ. Харин хурдан удмын хоёр адуу худалдаж авсан байх бөгөөд үнэлгээ нь гурван сая төгрөг. Нийтдээ хурдан удмын 12 адуутай болж, үнэлгээ нь 303 сая төгрөг болжээ. Авлагын хэмжээ нэг дахин нэмэгдэж, 202 сая төгрөг болсон, хадгаламжинд байсан 8.5 сая төгрөг 0 төгрөг болсон гэж мэдүүлжээ. Иргэн Н.Бямбасүрэн, Худалдаа хөгжлийн банк, Голомт банк, “Тэгш саятан” ББСБ, ЭМПИПИ хадгаламж зээлийн хоршоонд 134 сая төгрөгийн өртэй болсон байна.