Ч.Хүрэлбаатар сайдын дуулгасан сайн мэдээ-Экспортын орлогыг 14.1 тэрбум ам.долларт хүргэнэ

        УИХ өнгөрсөн долоо хоногт Монгол Улсын хөгжлийн 2024 оны төлөвлөгөөг баталсан. Ингэснээр ирэх онд манай улсын эдийн засаг ямар байх тухай төсөөллийг олон нийт харж, эргэцүүлж, шүүн тунгаах боломж бүрдсэн гэсэн үг. Эдийн засаг, хөгжлийн сайд Ч.Хүрэлбаатар "Монгол Улсын хөгжлийн 2024 оны төлөвлөгөө өрхийн орлогыг нэмэгдүүлэхэд чиглэнэ" хэмээн онцолж, сонгуулийн жилд эдийн засаг ямар байхыг сонирхолтой статистик болгон сошиал пост оруулжээ.

 Ч.Хүрэлбаатар сайдын олон нийтийн сүлжээгээр мэдээлсэн сайн мэдээг энд онцолъё.

 -Экспортыг нэмэгдүүлэх

-Хөрөнгө оруулалтыг нэмэгдүүлэх

-Хүний хөгжлийн үзүүлэлтийг сайжруулах

-Аялал жуулчлалыг хөгжүүлэх

 -Хүнсний хангамж, аюулгүй байдлыг сайжруулах

 -Улаанбаатар хотын түгжрэл, агаарын бохирдлыг бууруулах

-Засаглалыг сайжруулах

-Ногоон хөгжлийг дэмжих гэсэн 8 бодлогын тэргүүлэх чиглэлийг тодорхойлж, нийтдээ 14 их наяд төгрөгийн санхүүжилт бүхий 194 төсөл, арга хэмжээг хэрэгжүүлнэ.

 Үүнээс улсын төсвийн хөрөнгөөр 2.4 их наяд төгрөг, орон нутгийн төсвийн хөрөнгөөр 0.18 их наяд төгрөг, гадаадын зээлээр 1.38 их наяд төгрөг, гадаадын тусламжаар 0.44 их наяд төгрөг, төр, хувийн хэвшлийн түншлэлээр 4.52 их наяд төгрөг, хувийн хөрөнгө оруулалтаар 3.5 их наяд төгрөг, бусад эх үүсвэрээр 1.59 их наяд төгрөгийг тус тус санхүүжүүлэхээр тусгав.

Уг төлөвлөгөө хэрэгжсэнээр дараах үр дүнд хүрнэ. Үүнд:

-Экспортын хэмжээ 13.7 тэрбум ам.долларт,

 -Боомтын ачаа нэвтрүүлэх хүчин чадал 80 сая тн-д,

-Байгаль орчны гүйцэтгэлийн үзүүлэлт 25 байраар урагшлуулна,

 -Гадаадын хөрөнгө оруулалт 4.0 тэрбум долларт,

 -Хүний хөгжлийн үзүүлэлт 4 байраар урагшлуулна,

 -Хүлээн авах гадаад жуулчдын тоо 1.3 сая-д хүргэнэ.

Улсын хөгжлийн 2024 оны төлөвлөгөө нь үр дүнд суурилсан төлөвлөлтийн зарчмыг баримтлан, урт, дунд хугацааны бодлогын баримт бичгүүдтэй бүрэн уялдаж, хувийн хэвшлийн хөрөнгө оруулалт, хамтын ажиллагааг түлхүү дэмжсэн төлөвлөгөө боллоо. Ирэх жил төр, хувийн хэвшлийн түншлэл, нөөц боломж, 2024 оны улсын төсөв бүхэлдээ хөгжлийн жилийн төлөвлөгөөнд тусгасан зорилт, арга хэмжээг хэрэгжүүлэхэд чиглэх юм. Эдийн засаг, хөгжлийн сайд Ч.Хүрэлбаатарын олон нийтийн сүлжээнд мэдээлсэн эдийн засгийн талаарх статистик төсөөллийг Монгол Улс ирэх онд ямар байх вэ гэдгийг тоон үзүүлэлтээр харуулсан бүрэн зураглал ч гэж болох.

 Тэрбээр өнөөдөр (2023.06.05) хэд хэдэн сайн мэдээг олон нийтэд сошиал постоороо дамжуулан түгээлээ. Тухайлбал:

 Монгол Улсын хөгжлийн 2024 оны төлөвлөгөөний бодлогын тэргүүлэх чиглэл болох “Экспортыг нэмэгдүүлэх” хүрээнд:

 -2022 онд Экспортын орлого 12.5 тэрбум ам.доллар байсныг 2024 онд 14.1 тэрбум ам.долларт хүргэнэ.

-Төмөр зам, авто замын ачаа тээвэрлэх хүчин чадлыг 1.5 дахин нэмэгдүүлж, нүүрсний экспортын биет хэмжээ 50 сая тоннд, зэсийн экспортын биет хэмжээ 1.5 сая тоннд, газрын тосны экспортын биет хэмжээ 6.0 сая баррельд тус тус хүргэнэ.

 -Нийт экспортын ачааны 90 гаруй хувь нь гурван боомтоор, импортын ачааны 93.2 хувь хоёр боомтоор хийгдэж байна. Иймд хилийн боомтуудыг өргөтгөн шинэчлэх ажлыг хэрэгжүүлж, боомтын ачаа нэвтрүүлэх хүчин чадлыг 1.6 дахин нэмэгдүүлнэ.

 -Нийт экспортын 90.2 хувийг түүхийгээр гаргаж байна.

Иймд хөдөө аж ахуйн гаралтай бүтээгдэхүүн боловсруулах үйлдвэр технологийн паркуудын дэд бүтцийн бүтээн байгуулалтуудыг хэрэгжүүлнэ.

-Мах, махан бүтээгдэхүүний экспорт цар тахлын өмнөх үеэс дөрөв дахин буураад байна. Иймд мал, амьтны гоц халдварт, халдварт өвчнийг бууруулах вакцинжуулалтыг бүрэн хийж махны экспортыг 30 мянган тонн-д хүргэнэ.

 -Экспортын үйл ажиллагаанд зарцуулж буй хугацаа 2022 онд 302 цаг байгааг гадаад худалдааг хөнгөвчлөх замаар 72 цаг болгож бууруулна.

 Дээрх зорилтуудын хүрээнд нийт 2.7 их наяд төгрөгийн 23 төсөл арга хэмжээ хэрэгжүүлэхээр төлөвлөсөн талаар мэдээллээ.