Хүүхдийн мөнгө, нөхөн олголтод 167 тэрбум төгрөг зарцуулна

Сангийн сайд Б.Жавхлан, Хөдөлмөр, нийгмийн хамгааллын сайд Х.Булгантуяа нар өнөөдөр УИХ-д Төсвийн тодотголын төслийг өргөн барьсан талаар мэдээлэл өглөө. 

Төсвийн тодотголд:

• Өндөр настны тэтгэвэр нэмэгдүүлэх,
• Халамжийн тэтгэвэр тэтгэмжийг нэмэгдүүлэх,
• Хүүхдийн мөнгөн тэтгэмжийг хүсэлт гаргасан хүүхэд бүрт олгож, иргэдийн бодит орлогыг нэмэгдүүлэх багц арга хэмжээ авч хэрэгжүүлэхээр тусгажээ. 

Сангийн сайд Б.Жавхлан төсвийн тодотголын талаар "2023 оны улсын төсвийг 1.8 их наяд төгрөгөөр тодотгох гэж байна. Үүний 50 хувь буюу 996 тэрбум төгрөг нь төрийн албан хаагчдын цалинг нэмэгдүүлэхэд зарцуулагдана. Мөн ахмад настны тэтгэврийн хэмжээг нэмэхэд 396 тэрбум төгрөг зарцуулна. Хүүхдийн мөнгийг хүсэлт гаргасан хүүхэд бүрд олгох буюу өнгөрсөн хугацааныхыг нь нөхөн олгоход нийт 167 тэрбум төгрөг зарцуулах шийдвэр гаргалаа" гэсэн мэдээлэл өглөө.

Хөдөлмөр, нийгмийн хамгааллын сайд Х.Булгантуяа "Одоогийн байдлаар Хүүхдийн мөнгөн тэтгэмжид 91% нь хамрагдаж байгаа. Манай яаманд "Хүүхдийн мөнгөний хүсэлтээ одоо хэрхэн яаж гаргах вэ" гэдэг асуудлыг олноор тавьж байгаа. Бүх хүүхдийн хүсэлтийг дахин И-Монголиа систем дээр авна гэвэл ачааллыг даахгүй байж магадгүй. Тиймээс бид нөхөж авах гэж байгаа буюу нэмэлтээр орж ирэх гэж байгаа 9% дээрээ л хүсэлт авъя гэж байгаа. Хүүхдийн мөнгө нөхөж авах хүсэлтийг цахимаар авъя. Хэрэв цахимаар өгөх боломжгүй бол өөрсдийн харьяалагддаг Хөдөлмөр халамжийн хэлтэстээ хандах боломжтой. 

Мөн иргэд хүсвэл Хүүхдийн мөнгөө Хүүхдийн төлөө санд хандивлаж болно. Хүүхдийн төлөө санд 11 тэрбум төгрөг хуримтлагдсан байдаг. Энэ мөнгөнөөс 1 тэрбумыг нь зарцуулсан, 10 тэрбум нь хадгалагдаж байгаа. Сангийн мөнгийг хүүхдэд зориулсан томоохон бүтээн байгуулалтад зарцуулах төлөвлөгөөтэй байгаа" гэлээ. 

Мөн зорилтот халамжийн тэтгэмжид 89.3 тэрбум төгрөг зарцуулахаар шийдвэрлэжээ. 

Дээр дурдсан таван чиглэлд төсвийн тодотголыг зарцуулснаар нэг сая гаруй хүнд үр дүн нь хүрнэ гэж тооцсон байна.