Хөгжлийн бэрхшээлтэй хүмүүсийн эрхийн тухай конвенцын тайланг НҮБ-ын Хүний эрхийн хороонд хэлэлцүүлэх салбар дундын ажлын хэсэг хуралдлаа

     Монгол Улс 2008 онд Хөгжлийн бэрхшээлтэй хүмүүсийн эрхийн тухай НҮБ-ын конвенц, түүний нэмэлт протоколыг соёрхон баталж, конвенцын үзэл баримтлал, зарчимд нийцсэн Хөгжлийн бэрхшээлтэй хүний эрхийн тухай хуулийг батлан хэрэгжүүлж байна.

Конвенцын хэрэгжилтийн талаарх Монгол Улсын Засгийн газрын анхны тайланг 2011 онд НҮБ-ын Хөгжлийн бэрхшээлтэй хүмүүсийн эрхийн хороонд илгээж, 2015 онд хэлэлцүүлсэн бөгөөд 2 болон 3 дугаар нэгтгэсэн тайланг НҮБ-ын Хүний эрхийн хорооноос ирүүлсэн 54 богино асуумжийн дагуу боловсруулан 2019 онд НҮБ-д хүргүүлсэн.

Швейцарын Холбооны Улсын Женев хотноо 2023 оны 08 дугаар сарын 15-20-ны өдрүүдэд болох НҮБ-ын Конвенцын Хорооны 29 дүгээр хуралдаанд Засгийн газрын ээлжит 2 болон 3 дугаар тайланг хэлэлцүүлэх чиг үүрэг бүхий ажлын хэсгийн бүрэлдэхүүнийг өнөөдрийн Засгийн газрын хуралдаанд хэлэлцүүлж батлав.

Энэ хүрээнд тайланг эцэслэн боловсруулан хэлэлцүүлэх бэлтгэл ажлыг хангаж, салбар дундын ажлын хэсэг хуралдлаа.

Тайланг хэлэлцүүлэх салбар дундын ажлын хэсгийг Хөдөлмөр, нийгмийн хамгааллын дэд сайд С.Зулпхар ахлан явах юм.