Нүхэн гарц: Нүд гялбасан зураг төслийг "гурилдсан" бодит байдал

      Монголд төсвийн мөнгөөр баригдсан бүтээн байгуулалтууд зураг төслөөсөө асар өөр болдог нь бараг жишиг болоод тогтчихсон. Үүний нэг жишээ яармагийн нүхэн гарц болж байна.

Эл нүхэн гарцыг анх “22 хоногт л барьж дуусгана” гэсэн Хотын дарга Д. Сумъяабазарын үгтэй эхлүүлж байсан ч, ашиглалтад орохоосоо урьтаад олны хэл амны шүүмжлэлийн бай болсоор.

Энэ зуны эхэн сард хэсэгхэн зуур цохиод өнгөрсөн адаар бороонд нүхэн “бассейн” болсон дүр зураг нь хотын даргыг шүүмжлүүлж байв.

Харин долоохон хоногийн өмнө борооны улмаас доороосоо эвдэрч эхэлсэн билээ. Энэ тухай Хан-Уул дүүргийн Засаг дарга Ж.Алдаржавхлан "Яармагийн нүхэн гарцын эхэнд барилга барьснаас болж эвдэрлээ" хэмээсэн байдаг.

Өнгөрсөн наймдугаар сар /2022.08/-д төсөв батлуулж "Яармагийн зам"-д нүхэн гарц барих ажлыг эхлүүлж, маш хурдан хугацаанд буюу есдүгээр сар /2022.09/-д ашиглалтад оруулах амлалтай байсан. Гэвч бүтэн жил тойрлоо.

Одоо зураг төслөөсөө асар өөр.

Зураг төсөлдөө "Цав цагаан шалтай. Өргөн шат, явах зай талбай томтой. Таазандаа асар олон гэрэлтэй. Дугуй, дөрвөлжин, урт гонзгой гэхчлэн гэрлэн таазандаа гэрлэн чимэглэлүүд ихтэй" байх аж.

Харин бодит байдал дээрээ "Зай талбай асар бага. Явган зорчигчийн алхах шалыг гүйлтийн зам шиг нов ногоон өнгөөр будаж, цагаан шугам татжээ. Гэрэлтүүлэг нь хамгийн таагүй. Хэдэн туузан гэрэл дараалуулж наагаад л болжээ".

Зураг төсөл ба бодит байдлын зургаа "засварын ажил дуусаагүй" гэдэг үгээр хаацайлцгааж буй. Гэхдээ энэ янзаараа хэзээ ч зураг төсөл шигээ болохгүй гэдэг нь лавтай. "Шат шатандаа идсээр хийх ёстой зүйлс нь хийгддэггүй. Зураг төсөл шигээ болдоггүй" гэдэг шүүмжлэл үнэний ортой. Тэр нь Яармагийн нүхэн гарцан дээр илхэн биелжээ.