Р.ЭМҮЖИН: Б.Чойжилсүрэн тараа таниулж, тархиа хэмжүүллээ дээ. Ченж бол ченж л байдаг юм байна

      Нийслэл нийт 500 тэрбум хүртэлх төгрөгийн үнэт цаас гаргаж, үүний 177.5 тэрбум төгрөгөөр нь БНХАУ-аас хагас коксжсон нүүрс асаагуурын хамт худалдаж авах талаар Нийслэлийн Засаг дарга Д.Сумъяабазар НИТХ-д танилцуулсан.

Тэгвэл өчигдөр Эрчим хүчний сайд Б.Чойжилсүрэн НИТХ-д оролцож энэ талаар дараах байр суурийг илэрхийлсэн нь олон хүний дургүйцлийг төрүүлээд байгаа юм. Тэрээр "Утааг бүрэн гүйцэд алга болгоно гэж гоё юм ярьж чадахгүй. Харин багасгая гэж байгаа юм. Ирэх өвөл 12 дугаар сарын 15-наас нэгдүгээр сарын 31-ний хооронд галлагаа хийнэ. 177 тэрбум төгрөгийн 30 орчим тэрбум төгрөг нь асаагч байна. Үлдсэн нь хагас коксжсон нүүрс худалдан авахад зарцуулна.

Улаанбаатар хот 1.6 сая хүнтэй болсон. Олон хүндрэл, сорилтууд тулгарч байна. Ийм л шийдэл байна. Хамгийн төгс төгөлдөр шийдэл гэж хэлэхгүй. Гэхдээ зүгээр байснаас оролдоод үзье гэсэн шийдвэр гарсан. Энэ өвөл Улаанбаатар хотод үүнийг туршина. Туршилт гэдэг үгнээс айхгүй байна" хэмээсэн юм. 

Тэгвэл яруу найрагч Р.Эмүжин түүнд хандан пост оруулжээ.

"Хүүе энэ хүнээ аваач ээ.

Нийслэл анх удаа бонд гаргаж, хүндрэлтэй асуудлуудаа шийдэх мөнгө босгох юм гэсэн. Тэгсэн Эрчим хүчний сайд, Хурд грүппийн босс, эрх баригч намын эрх хэтэвч болсон энэ нөхөр 177 тэрбумаар хагас кокосжсон нүүрс Хятадаас авч, 45 хоногийн турш нийслэлчүүдийн зуух пийшинг дүүргэж өгөөд утсаа чагнана гэнэ ээ. Энд тэндээс хүн угаартлаа, зуух пийшин хайллаа, яндан шатлаа гэсэн дуудлага ирэх нь үү, үгүй юу турших юм байх аа. За хажуугаар нь Чойжоо мэргэн санаа олж утаа буурлаа гэсэн сурталчилгаа бас нүд сохолж, чих дүлийртэл явж таарна. Ер нь бол цементэн ойн тарзаан хочтой Чойжоо ямар зорилгоор, юу яриад эхлэв? Нүүрс гаргаж хулгай хийдэг байсан, бирж дээр үнэ хаялцуулдаг болсноос хойш сиймхий нүх, сэтэрхий тэвнэ ч олдохоо больсон юм гэсэн. Нүүрс импортлож цавчаа хийнэ гэж байх уу? Чойжилсүрэн гэж энэ нөхөр улс төрд Н.Энхбаярын үед 2005 оноос орж ирсэн, 2008 оноос хойш тасралтгүй УИХ-д сонгогдож байгаа, Сангийн сайд, ЭХ-ний сайд гэхчлэн мөнгө асар ихээр эргэлддэг яамдыг толгойлж өнөөг хүрсэн. Жилийн орлого нь 5.0 тэрбум гэсэн тоог хөрөнгө орлогын мэдүүлэгтээ дурдсан юм гэсэн. Ямартай ч УИХ-ын хамгийн баян гишүүн, бас хамгийн харгис барилгачин. Гол ус, ой, шим мандал, хотын алсын төлөв байдлыг үл харгалзан, ар араас нь адил загварын аймаар шахуу байшингууд босгож, нийслэлийг цементэн шугуй болгосон, өөрөө дунд нь тарзаандаж явдаг. Нийслэлийн дундуур урсдаг, агаар чийгшүүлж, зөөллөх үүрэгтэй гурван голын амийг атгасан. Нийт 30 гаруй компанитай, хувьцааг нь эзэмшдэг гэдэг. Түүний Солар хаус гэх компани ЖДҮ-тэй нэр холбогдож байсан. За одоо тэгээд тарзааны туршилтанд бүгдээрээ орох билүү, яах билээ? Увсынхан энэ хүнээ авч, Улаангомынхон эхлээд туршилтанд орох юм уу? Сонгуулийн урд өдөр увсынхны хүн нэг бүрийн дансанд 50, 100к шилждэг, хэн илгээснийг нь бүгд мэддэг, ханцуй дотроо залбираад харайж очоод саналаа өгдөг юм гэсэн шүү. 50, 100к-гаар тарзаан л илгээх юм даа. 15 жил тасралтгүй сонгосон гишүүн чинь нийслэлчүүдээр туршилт хийнэ гээд байна шүү. Бид ямар харх юм уу, Чойжоо ямар лабораторийн эрхлэгч юм уу? Хорин жил дуншсан тавдугаар цахилгаан станцаа баръя аа гэх юм болов уу гэж хүлээсэн чинь тараа таниулж, тархиа хэмжүүллээ дээ. Ченж бол ченж л байдаг юм байна. Нүүрс ченжлэнэ гэнэ ээ. Барилгын бизнесээс ашигтай харагдав уу, эсвэл Хятадын компаниудтай үүсгэсэн өглөг авлагаа нүүрсээр хааж, нийслэлийн мөнгө, нийслэлчүүдийн эрүүл мэнд хоёроор наадаад азаа үзэх гэв үү? Улс төрийн карьер нь нэгэнт улдсан болохоор их ч үмхий, бага ч үмхий гээд дайрах нь л дээ, золиг чинь! Ингэхэд энэ хүн чинь ЭХ-ний сайд юм уу, нүүрсний наймаачин юм уу, туршилтын лабораторийн эрхлэгч юм уу, яг аль нь юм бээээ?" хэмээсэн байна.