Монгол Улсын экспорт 29.2 хувиар өсжээ

        Монгол Улс энэ оны эхний 8 сард 155 улстай худалдаа хийж, гадаад худалдааны бараа эргэлт 16 тэрбум, үүнээс экспорт 10 тэрбум, импорт 5.9 тэрбум ам.доллар байна.

Нийт бараа эргэлтийн хэмжээ өмнөх оны мөн үеийнхээс 2.6 (19.6 хувь) тэрбум, экспорт 2.3 (29.2 хувь) тэрбум, импорт 347.1 (6.2 хувь) сая ам.доллароор өсжээ. Харин энэ оны 8 дугаар сард экспорт өмнөх сарынхаас 160 (14 хувь) сая, импорт 172.8 (23 хувь) сая ам.доллароор өссөн байна. Гадаад худалдааны тэнцэл энэ оны эхний 8 сард 4.1 тэрбум ам.долларын ашигтай гарч, өмнөх оны мөн үеийнхээс 1.9 (89.5 хувь) тэрбум ам.доллароор өссөн бол энэ оны 8 дугаар сард 382 сая ам.долларын ашигтай гарч, өмнөх сарынхаас 12.8 (3.2 хувь) сая ам.доллароор буурав.

БНХАУ-тай энэ оны эхний 8 сард  11.6 тэрбум ам.долларын худалдаа хийсэн нь гадаад худалдааны бараа эргэлтийн 72.6 хувийг эзэлж байлаа. БНХАУ-д экспортолсон барааны 61.7 хувийг чулуун нүүрс, 19.3 хувийг зэсийн баяжмал эзэлж байгаа бол Швейцар Улсад экспортолсон барааны 99.6 хувийг алт эзэлжээ. Энэ оны эхний 8 сард экспорт өмнөх оны мөн үеийнхээс 2.3 тэрбум ам.доллароор өсөхөд нүүрс 2 тэрбум, газрын тос 135.1 сая, жоншны  хүдэр, баяжмал 96.9 сая, лаазалсан махан  бүтээгдэхүүн 91.5 сая, адууны мах 66.3 сая, төмрийн хүдэр, баяжмал 30.5 сая ам.доллароор өссөн нь голлон нөлөөлжээ.

Өнгөрсөн 8 дугаар сард алтны хилийн дундаж үнэ өмнөх сарынхаас кг тутамд 1481.1 ам.доллароор, нүүрсний хилийн дундаж үнэ тонн тутамд 0.4 ам.доллароор буурч,  зэсийн баяжмалын хилийн дундаж үнэ тонн тутамд 16.4 ам.доллароор, төмрийн хүдэр, баяжмалын хилийн дундаж үнэ тонн тутамд 1.6 ам.доллароор өссөн байна. Нүүрсний экспортын биет хэмжээ энэ оны 8 дугаар сард 7.2 сая тонн болж, өмнөх сарынхаас 1.3 сая тонноор, үнийн дүн 785.5 сая ам.доллар болж, 141.3 сая ам.доллароор өсжээ.

Импортын дүнд энэ оны эхний 8 сарын байдлаар БНХАУ 39.9, ОХУ 27.2, Япон 7.8, БНСУ 4.4, АНУ 3.3, ХБНГУ 2.4 хувийг эзэлж, нийт импортын 85 хувийг бүрдүүлж байгааг Үндэсний статистикийн хороо мэдээллээ. ОХУ-аас импортолсон барааны 71.6 хувийг нефтийн бүтээгдэхүүн, Япон Улсаас импортолсон барааны 75.3 хувийг суудлын автомашин, БНХАУ-аас импортолсон барааны 8.7 хувийг ачааны автомашин эзэлж байв. Импорт өмнөх оны мөн үеийнхээс 347.1 сая ам.доллароор өсөхөд дизелийн түлш 146.4 сая ам.доллароор, хар төмөр бүтэц, эд анги, барилгын эдлэл 61.1 сая ам.доллароор, суудлын автомашин 57.1 сая ам.доллар, бульдозер, авто  хусуур, индүүдэгч,  тэгшлэгч, эксковатор 32.7 сая ам.доллароор өссөн нь голлон нөлөөлжээ.

Эрдэс бүтээгдэхүүн, үнэтчулуу, металл, гоёлын зүйлс, нэхмэл бүтээгдэхүүний экспорт нийт  экспортын 94.5 хувийг эзэлж байгаа бол импортын 77.6 хувийг эрдэс  бүтээгдэхүүн, машин механик төхөөрөмж, цахилгаан, тээврийн хэрэгсэл, тэдгээрийн эд анги, үндсэн төмөрлөг, түүгээр хийсэн болон хүнсний бэлэн бүтээгдэхүүн эзэлсэн аж.