Чингэлтэй дүүргийн эрүүл мэндийн төв барих газрыг 6.8 тэрбум төгрөгөөр чөлөөлжээ

     Чингэлтэй дүүргийн Засаг дарга Н.Батсүмбэрэл өнөөдөр /2023.11.20/ дүүргийн ахмадуудаа хүлээн авч, санал бодлыг нь сонсч уулзалт хийлээ. Чингэлтэй дүүрэгт 17 мянга орчим ахмадууд амьдарч байна.

Уулзалтын эхэнд дүүрэгт хийгдэж буй улс, нийслэл, орон нутгийн төсвийн хөрөнгө оруулалтаар хийгдэж буй бүтээн байгуулалт, боловсрол, эрүүл мэндийн салбарын тулгамдсан асуудал болон төр захиргааны байгууллагын үйл ажиллагааг танилцуулж, тэдний санал бодлыг сонслоо.

Чингэлтэй дүүргийн Засаг дарга Н.Батсүмбэрэл уулзалтад оролцогчдод дүүрэгт хэрэгжүүлж буй ажлын талаар танилцууллаа. Дүүргийн засаг даргын 2020-2024 оны үйл ажиллагааны хөтөлбөрт 6 зорилт 179 арга хэмжээг авч хэрэгжүүлж ажиллаж байна. Иргэдэд чиглэсэн олон ажил хийж байгаагын нэг нь эрүүл мэндийн салбарт явагдаж байна. Тухайлбал Чингэлтэй дүүрэг зориулалтын эмнэлгийн байргүйн улмаас эмнэлгийн тоног төхөөрөмж суурилах боломжгүй. Тиймээс иргэдэд үзүүлэх эрүүл мэндийн тусламж үйлчилгээ хангалтгүй байдаг. Энэ асуудлыг шийдэхээр дүүргийн 10 дугаар хорооны нутаг дэвсгэрт 55 нэгж талбарт дүүргийн төсвийн хөрөнгө оруулалтаар 6.8 тэрбум төгрөгөөр газар чөлөөлтийг хийсэн. Энэ газарт Азийн хөгжлийн банкны санхүүжилтээр жишиг эрүүл мэндийн төв эмнэлэг барих ажил ирэх жилээс эхлэх юм.

Мөн дүүргийн иргэдийн талархлыг хүлээгээд байгаа нэг ажил бол “Ногоон бүс” юм. Дүүргийн 1-3 хороо Төв шуудангийн уулзвараас баруун дөрвөн замын уулзвар хүртэлх нийт 51.7 га талбайг камержуулж уг төсөл эхэлж байсан бол одоо дүүргийн нутаг дэвсгэрийн 117 цэгт 1857 камер ажиллаж байна. “Ногоон бүс” болсноор иргэдийн эрүүл аюулгүй орчинд амьдрах эрхийг хангасан, гэмт хэрэг зөрчлөөс урьдчилан сэргийлэх, илрүүлэх, үйлдэл дээр нь таслан зогсоох боломжийг бүрдүүлсэн жишиг ажил болсон юм.

Уулзалтад оролцсон ахмадууд ая тухтай амьдрах нөхцөл боломжийг бүрдүүлж, ногоон байгууламж нэмэгдүүлэх талаар санал бодлоо хэллээ. Мөн ахмадуудаас дэвшүүлж буй саналыг ажилдаа тусгах, эрүүл мэндийн тусламж үйлчилгээг илүү сайжруулах, ахмадуудад зориулсан төрийн үйлчилгээг хүртээмжтэй болгох талаар санал хүсэлтээ уламжиллаа.

Чингэлтэй дүүрэгт 55-аас дээш насны 20617 мянган иргэн амьдарч байна. Дүүргийн удирдлагуудын зүгээс дүүргийн ахмадын хороо болон 1-24 дүгээр хороодын ахмадын зөвлөлтэй хамтран ажиллаж, тэднээр дамжуулан ахмадуудын санаа бодлыг сонсож ажиллаж байна.