Монголын хэмээх тодотголыг харуулсан 60 гаруй аягыг дэлгэжээ

       “Нүүдэлчдийн аяга” тусгай үзэсгэлэн Монголын Үндэсний музейд үргэлжлэн гарч байна.

Монгол түмний баялаг их өв уламжлалын нэгээхэн хэсэг нь аяга хэмээх идээ ундаа хүртэх сав юм. Эртний нүүдэлчдээс олон мянган жилийн турш өвлөгдөн ирсэн аяга, сав суулгатай холбоотой ёс заншлаас гадна урлах ухаан, гоо зүйн нарийн мэдрэмжийг түүнээс харах бололцоотой.

Хүн төрөлхтөн үүсэн бий болсон цагаас эхлэн хоол ундны зориулалттай сав суулгыг бүтээн өөрсдийн хэрэгцээгээ хангахын зэрэгцээ, түүний ур хийцийг төгөлдөржүүлэн хөгжүүлж, гоозүй бэлгэдлийн агуулга санааг шингээн ирсэн нь тухайн үндэстэн угсаатны түүх соёлын онцлогийг улам тодотгодог.

 Энэхүү үзэсгэлэнд Монголын Үндэсний музей болоод орон нутгийн зарим музейн сан хөмрөг, хувь цуглуулагчид хадгалагдаж буй түүх соёлын шилээвэр үзмэр, эд өлгөөс үзэгчдэд толилуулж байна.

Мөн түрүү хүрлийн үед холбогдох чулуун аяганаас эхлэн дэлхийд нэр алдраа цуурайтуулсан Монголын Эзэнт гүрний үеийн буюу Монголын хэмээх тодотголыг харуулах модон болон шаазан аяганууд, XVII-XX зууны үеийн Монголчуудын дунд ур хийцээрээ алдаршсан нутаг нутгийн хийц урлал бүхий аягануудыг онцлон хүргэж байна.

Түүнчлэн үзэсгэлэнд түүхийн олон цаг үед холбогдох, олон төрлийн материал ашиглан урласан нийт 60 гаруй аягыг сонгон авч танилцуулж буй юм. Тухайлбал, УГЗ, дархан Ш.Гүндийн 1946 онд урласан маршал Х.Чойбалсанд дурсгасан мөнгөн аяга, маанийн үсэгтэй гавал аяга, тахилын цар таваг, "Боо-Бао" эрдэнэ хэмээх манж бичигтэй хул аяга зэргийг эл үзэсгэлэнгээс үзэх боломжтой. Маршал Х.Чойбалсанд дурсгасан мөнгөн аяганы бөөрийг товойлгосон нэгэн ижил хэмжээтэй 24 бад зээ, 12 жилийн хооронд монгол бичгээр "6 дугаар хорооны ардуудаас Улсын шалгарсан маршал Чойбалсангийн 50 насны ойд дурсгав" хэмээн товойлгон бичжээ.

Үзэсгэлэн хоёрдугаар сарын 20-ныг хүртэл олны хүртээл болно.