Сангийн сайд Б.Жавхлан Элчин сайд Шэнь Миньжуанийг хүлээн авч уулзлаа

      Сангийн сайд Б.Жавхлан (2024.01.10) Бүгд Найрамдах Хятад Ард Улсаас Монгол Улсад суугаа Элчин сайдаар томилогдсон хатагтай Шэнь Миньжуанийг хүлээн авч уулзлаа.

Уулзалтын эхэнд Сангийн сайд Б.Жавхлан Монгол Улсын нийгэм, эдийн засгийн цар тахлын үе болон өнөөгийн нөхцөл байдлын талаар товч мэдээлэл өгч цар тахлын үеийн сорилт бэрхшээлийг амжилттай даван туулахад БНХАУ-ын дэмжлэг чухал үүрэгтэй байсныг онцоллоо.

Мөн Л.Оюун-Эрдэнийн Засгийн газар БНХАУ-д хийх төрийн дээд, өндөр түвшний айлчлалын давтамжийг нэмэгдүүлж улмаар хоёр улсын найрсаг харилцаа, хамтын ажиллагааг шинэ шатанд гаргасан гэдгийг тэмдэглэлээ.

Монгол, Хятад хоёр орны гадаад худалдааны эргэлт 2023 онд 17.3 тэрбум ам.долларт хүрсэн бөгөөд энэ өсөлтийг ирэх жилүүдэд тогтвортой нэмэгдүүлэн ажиллахыг зорьж буйгаа илэрхийлсэн юм.

Түүнчлэн БНХАУ-ын Засгийн газраас Монгол Улсын Засгийн газарт олгож буй нэн хөнгөлөлттэй зээл, буцалтгүй тусламжийн хөрөнгөөр хэрэгжиж буй төслүүдийн явцыг эрчимжүүлэх, шинээр хэрэгжих төслүүдийг эхлүүлэхэд онцгой анхаарч ажиллаж байна.

Тухайлбал, хоёр орны Төрийн тэргүүн нарын дэмжсэн “Цөлжилттэй тэмцэх Монгол, Хятадын хамтын ажиллагааны төв болон үзүүлэнгийн талбай байгуулах төсөл”-ийн техник, эдийн засгийн үндэслэл боловсруулах тухай солилцох захидлыг ойрын хугацаанд байгуулах бэлтгэл ажлыг ханган ажиллаж байгааг онцоллоо.

Элчин сайд, хатагтай Шэнь Миньжуань Сангийн сайд Б.Жавхланд талархал илэрхийлээд хоёр орны харилцаа хамтын ажиллагаа улам өргөжиж, тэр дундаа гадаад худалдааны эргэлт 40 хувиар нэмэгдсэнийг сайшаалаа.

БНХАУ-ын нийслэл Бээжин хотноо 2023 оны 10 дугаар сард зохион байгуулагдсан “Бүс ба зам” олон улсын хамтын ажиллагааны дээд түвшний чуулга уулзалтын үеэр хоёр орны Төрийн тэргүүн нарын нэгдсэн ойлголцолд хүрсэн ажлуудыг бодит ажил хэрэг болгох, харилцаа, хамтын ажиллагааг хөгжүүлэхийн төлөө хамтран ажиллахаа илэрхийллээ.

Монгол Улс, Бүгд Найрамдах Хятад Ард Улсын хооронд дипломат харилцаа тогтоосны 75 жил, Иж бүрэн стратегийн түншлэлийн харилцаа тогтоосны 10 жилийн ой 2024 онд тохиож байна.