Үндсэн хуулийн Цэцийн даргаар Г.Баясгаланг сонгох уу

         УИХ өчигдөр (2024.05.30) бүрэн эрхийн хугацаа нь дуусгавар болсон Ш.Солонго, Б.Буяндэлгэр, Г.Туулхүү нарын оронд Б.Болдбаатар, Ц.Цолмон, Р.Батрагчаа нарыг Үндсэн хуулийн Цэцийн гишүүнээр томилсон. Харин өнөөдөр Үндсэн хуулийн Цэц 14 цагт хуралдаж шинэ даргаа сонгох аж. Улс төрийн хүрээнд багагүй хүлээлт үүсгэж, хэрхэх нь тодорхойгүй байсан энэ томилгоог сонгуулийн марафонтой давхцуулан хийх гэж буй нь олон нийтийн анхаарлыг татаж байна. Төрийн ордноос авсан мэдээллээр, Үндсэн хуулийн Цэцийн даргаар Г.Баясгаланг сонгох нь бараг тодорхой болжээ. УИХ-ын зарим гишүүн энэ талаар “Үндсэн хуулийн Цэцэд шинэчлэлийн салхи оруулах зайлшгүй шаардлагатай. “Хөгшдийн асрамжийн газар” гэж гоочлуулдаг болоод удаж байгаа шүү дээ. Тийм учраас “Үндсэн хуулийн Цэцэд шинэчлэл хийгээсэй. Үйл ажиллагааг нь төгөлдөржүүлээсэй. Өмнөх шигээ хуучинсаг, ужгирсан газар битгий байгаасай, өөрчлөгдөөсэй” гэдэг үүднээс төрийн албаны туршлагатай, хууль, эрх зүйн салбарын өндөр мэдлэгтэй, Цэцэд шинэчлэл хийж чадах хэмжээнд бэлтгэгдсэн залуу кандидатуудыг Үндсэн хуулийн Цэцийн гишүүнээр томилсон. Г.Баясгалангийн хувьд, Үндсэн хуулийн Цэцийг даргалж, шинэчлэл хийх хэмжээний лидер биш” хэмээн байр сууриа илэрхийлсэн юм. Эрхэм гишүүд ийнхүү эсрэг тэсрэг байр суурь илэрхийлж буй нь Г.Баясгалангийн хүүтэй холбоотой таагүй мэдээлэлтэй холбоотой. Тодруулбал, Үндсэн хуулийн Цэцийн гишүүн Г.Баясгалангийн хүү БНХАУ-д хар тамхины хэрэгт холбогдож, ялтан солилцоогоор Монголд авчирсан ч аавынхаа нэр нөлөөгөөр ямар ч ял шийтгэлгүй өнгөрсөн байж болзошгүй тухай мэдээлэл https://zarig.mn/h1y сайтад 2019 онд гарч байв. Цэцийн шинэ даргаар сонгогдох өндөр магадлалтай байгаа Г.Баясгалан Үндсэн хуулийн Цэцийн гишүүнээр 2019 онд томилогдсон.

                                                                                                                                                       Г.Анар