“Хөгжлийн бэрхшээлтэй иргэдийн хөдөлмөр эрхлэлтийг дэмжих төв” нээлтээ хийлээ

       Азийн хөгжлийн банкны хөнгөлөлттэй зээл, буцалтгүй тусламжийн санхүүжилтээр “Хөгжлийн бэрхшээлтэй иргэдийн оролцоог хангах, үйлчилгээг сайжруулах төсөл”-ийг Хөгжлийн бэрхшээлтэй хүнд үзүүлэх үйлчилгээний чанар, хүртээмжийг сайжруулах, хөгжлийн бэрхшээлтэй хүний хөдөлмөр эрхлэлтийг дэмжихэд чиглэсэн үндсэн 5 бүрэлдэхүүн хэсгийн хүрээнд хэрэгжүүлж байгаа.

 “Хөгжлийн бэрхшээлтэй иргэдийн байгууллагуудын чадавхыг бэхжүүлэх, хөдөлмөр эрхлэлтийг дэмжих” зорилтын хүрээнд Улаанбаатар хот дахь “Хөгжлийн бэрхшээлтэй иргэдийн хөдөлмөр эрхлэлтийг дэмжих төв”-ийг барьж, ашиглалтад оруулж байна. Нээлтэд Хөдөлмөр, нийгмийн хамгааллын сайд Х.Булгантуяа, Хөгжлийн бэрхшээлтэй хүний хөгжлийн ерөнхий газрын дарга М.Маргад-Эрдэнэ, Азийн хөгжлийн банкны Монгол дах суурин төлөөлөгч Шэннон Коулин үг хэллээ.

Төв нь Хөгжлийн бэрхшээлтэй иргэдийг хөдөлмөр эрхлэлтэд бэлтгэх, ажилд зуучлах, ажил мэргэжлийн зөвлөгөө өгөх, мэргэжлийн чиг баримжаа олгох, ажил олгогчид зориулсан сургалт зохион байгуулах, дэмжлэг үзүүлэх, хөгжлийн бэрхшээлтэй иргэдийн чиглэлээр судалгаа, инноваци болон хөдөлмөрийн сэргээн засалт, бизнес инкубаторын үйлчилгээ үзүүлэх чиг үүрэг бүхий төсөвт төрийн үйлчилгээний байгууллага байх юм.

Тус төвийн барилга нь 8 давхар, консольтой, төмөр бетон каркасан хийцтэй. Барилга нийт 4200 м2 талбайтай, хөгжлийн бэрхшээлтэй хүнийг саадгүй буулгаж, суулгахад зориулсан олон улсын стандартад нийцсэн автомашины түр зогсоол, бетон зам талбай, хөтөч замыг төлөвлөж хийгдсэн юм.

Давхар бүртээ хөгжлийн бэрхшээлтэй эрэгтэй, эмэгтэй хүний ариун цэврийн өрөөнүүд, амрах, алжаал тайлах амралтын өрөө болон цайны өрөөтэй тул хөгжлийн бэрхшээлтэй иргэд, үйлчлүүлэгчдийг бүх л өдрийн турш тав тухтай, саадгүй, аюулгүй, чөлөөтэй байлгахад анхаарч зохион байгуулалтыг төлөвлөж өгснөөрөө онцлогтой. Барилгын нэг, хоёр давхрууд нь Сэргээн засалт, сургалт, үйлдвэрлэлийн төвийн барилгатай хоолойгоор холбогдож байгаа нь хөгжлийн бэрхшээлтэй иргэд төрийн үйлчилгээг нэг дороос хүндрэл чирэгдэлгүй, хурдан шуурхай авах боломж бүрдсэн юм.