Ерөнхий сайд Л.Оюун-Эрдэнэ АН, ХҮН намтай хамтарсан Засгийн газар байгуулах байр суурьтай байгаа бөгөөд МАН-ын Удирдах зөвлөл өчигдөр хуралдаж хамтарсан Засгийн газар байгуулах, эсэхийг шийдэх ажлын хэсэг байгуулсан. Тус ажлын хэсэг бодлогын хувьд намууд байр суурь нэгдэж байгаа эсэхээс шалтгаалж, хамтарсан Засгийн газар байгуулах, үгүйгээ шийднэ гэж буй. Наанаа ингэж тайлбарлаж байгаа ч цаанаа хамтарсан намууд бүгд сэтгэл хангалуун албан тушаалаа хувааж авч чадвал тэд хамтарна.
Ерөнхий сайд Л.Оюун-Эрдэнийн толгойны өвчин одоо Засгийн газрын бүтэц, бүрэлдэхүүний асуудал болоод байгаа. Сонгуульд нэр дэвшээд унасан, нэр дэвшээгүй үлдсэн намын нөхөд нь албан тушаал гуйж гүйгээд амар заяаг нь үзүүлэхээ байсан гэнэ. МАН-ын гишүүдийн хувьд дангаараа Засгийн газар байгуулбал албан тушаалд очих боломж нь нэмэгдэнэ. Тиймээс ч МАН-ын ихэнх гишүүн хамтарсан Засгийн газар байгуулахыг дэмжихгүй байгаа аж. Н.Энхбаярыг оруулаад дөрвөн намын хамтарсан Засгийн газар болох учраас МАН-ын гишүүдийн албан тушаалд очих боломж багасч таарна. Хэрвээ Засгийн газраа хамтарч байгуулбал МАН Засгийн газрынхаа 50 гаруй хувьд нь хүнээ томилох бол үлдсэнийг нь хамтарсан намууддаа өгнө. Тодруулбал, Н.Энхбаярын квотод нэг сайд, ХҮН намд нэг сайд, Ардчилсан намд 8-10 сайдыг өгнө. Тиймээс Ерөнхий сайд Л.Оюун-Эрдэнэ эхний ээлжид Засгийн газрын бүтцээ нэмэгдүүлж 2-3 яам шинээр байгуулахаар ярьж байгаа бололтой. Энэ бол зайлшгүй байгуулах яам бус талуудын эрх ашгийг хангаж, албан тушаал өгөх гэсэндээ л төрийн албыг томсгож буй шийдвэр. 2016 онд манай төрийн алба 160 мянган албан хаагчтай байсан бол одоо 220 мянга хол давсан.
Харин Ардчилсан намын тухайд намын дарга Л.Гантөмөр хамтарсан Засгийн газарт орох хүсэлтэй байгаа нь тодорхой. Гэвч намын гишүүд нь дэмжихгүй байгаа бололтой. АН-ын бүлэг өчигдөр хуралдаж бүлгийн даргаараа О.Цогтгэрэлийг сонгосон. Тэрээр бүлгийн даргын хувьд хамтарсан Засгийн газар байгуулахыг дэмжихгүй байгаагаа илэрхийлсэн юм. Ямартаа ч өнөөдрөөс АН Засгийн газарт орж, ажиллах эсэхээ хэлэлцэж эхлэх аж. Гэхдээ найман жил сөрөг хүчин хийж, "ажилгүй" байсан Ардчилсан намынхан засагт хамтарвал намын гишүүдээ ажил, амьдралтай залгуулна. Гэхдээ дахиад л сөрөг хүчний хяналт сулрах сөрөг талтай.
ХҮН намын тухайд энэ сонгуулиар найман суудал авсан ч засагт хамтарвал намын дарга Т.Доржханд сайд болж таарах болов уу. ХҮН намын дарга Т.Доржханд өнгөрсөн дөрвөн жил эрх баригч МАН-ын захиа, даалгавраар ажиллаж ирсэн нь түүний хийсэн улс төрийн акцуудаар нотлогддог. Тиймээс тэрээр МАН-тай хамтарсан Засгийн газарт орж ажиллах нь байж боломгүй шийдвэр биш. Түүнийг Шадар сайд бөгөөд Эдийн засаг, хөгжлийн сайдаар томилохоор тохирсон гэх мэдээлэл Төрийн ордонд түгжээ.
Сонгуулиас хойш 30 хоногийн дотор Засгийн газраа байгуулах хуулийн хугацаатай. Гэхдээ эрх баригч нам наадмаас өмнө Засгийн газраа байгуулах зорилготой. Эхний ээлжид хамтарсан Засгийн газар байгуулах, эсэхээ шийдчихвэл томилгооны асуудал яригдаж эхэлнэ.
Эх сурвалж: Л.ОДОНЧИМЭГ itoim.mn
Facebook
Twitter
Youtube
Тэд COP17-г ингэж дүгнэв
Мүн Жэ Инийн тэмдэглэл
“Шинэ толь хэмээх бичиг” сонины 1913 оны 3 дахь дугаарт Монтенегро Улсын тухай нийтлэл гарч байжээ
Асма Нианг: Монголын тал нутаг надад ойр байдаг
Бууцагаан сумын малчин "шонхор агнуулахгүй" гэж арабуудтай маргалдсаны улмаас машинд дайруулж нас баржээ
С.Зоригийн хөшөөг МоАХ-ы хашаанд нүүлгэн шилжүүлжээ
Иргэн Г.Мөнхзул: Цахилгаан, дулааны төлбөрөө төлөхдөө сэтгэл зүйгээ бэлдээрэй, монголчууд аа
СУИС-д хүний эрхийн хичээл оруулахыг ХЭҮК шаардаад дөрвөн жил болжээ
Сэтгэгдэл бичих