Хөдөлмөрийн баатар, Ардын эмч, Гавьяат цолтнууддаа хүндэтгэл үзүүллээ

       Тулгар төрийн 2233, Их Монгол Улс байгуулагдсаны 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ойг тохиолдуулан гаргасан Ерөнхийлөгчийн зарлигаар эрүүл мэндийн салбараас Монгол Улсын Хөдөлмөрийн баатар, Ардын болон гавьяат эмч, Эрүүлийг хамгаалахын гавьяат ажилтан төрлөө.

Эрүүл мэндийн сайд С.Чинзориг Ерөнхийлөгчийн зарлиг тосч, төрийн өндөр дээд цол хүртсэн эрхмүүдийг хүлээн авч хүндэтгэл үзүүллээ. Тэрбээр хүн амын эрүүл мэндийг хамгаалах үйлсэд эрдэм мэдлэг, оюун ухаан, туршлагаа харамгүй зориулж ирсэн салбартаа хийсэн ажилтай, хэлэх үгтэй хүлээн зөвшөөрөгдсөн эрхэм хүмүүс төрийн өндөр дээд шагналын эзэд болж хөдөлмөр зүтгэлээ үнэлүүлсэнд баяртай байгаагаа хэлээд эрүүл мэндийн салбарын нийт хамт олны нэрийн өмнөөс болон хувиасаа гүн талархал илэрхийлж, эрүүл энх сайн сайхныг хүсэн ерөөлөө.

Хөдөлмөрийн баатар цол хүртсэн Монголын эмэгтэйчүүдийн холбооны хүндэт ерөнхийлөгч, Эрүүлийг хамгаалахын гавьяат ажилтан Доржийн Мөнхөө хүүхдийн эмч мэргэжилтэй, эрүүл мэндийн салбарт жирийн эмчээс эхэлж Эрүүлийг хамгаалах яамны эх нялхсын асуудал эрхэлсэн орлогч сайдаар таван жил ажилласан, хүүхэд, эмэгтэйчүүд, гэр бүлийн сайн сайхны төлөө бүхий л амьдралаа зориулан зүтгэсэн төр нийгмийн зүтгэлтэн билээ.

Ардын эмч цолоор эрүүл мэндийн салбар тэр дундаа хүүхэд, эх барихын чиглэлээр олон жил ажилласан одоо ч ажилласаар байгаа олон арван эмч нарыг бэлтгэсэн Эх хүүхдийн эрүүл мэндийн үндэсний төвийн эх барих, эмэгтэйчүүдийн зөвлөх эмч Сэдэдийн Хишгээ эмч шагнуулсан. Мөн энэ хүндтэй цолыг хүртсэн Улсын гуравдугаар төв эмнэлгийн зөвлөх Цэрэндоржийн Бадамсэд эмч дүрс оношилгоо судлалын салбарыг хөгжүүлэхэд мэргэжлийн ур чадвараа дайчлан ажиллаж, эрдэм шинжилгээний олон арван ном, гарын авлага, өгүүлэл туурвин дүрс оношилгооны мэргэжилтэн бэлтгэн сургаж, эрүүл мэндийн салбарын хөгжилд жинтэй хувь нэмрийг оруулсан нэгэн юм.

Баатар төрүүлж, Ардын эмч нараар бүл нэмсэн эрүүл мэндийн салбар энэ удаа таван гавьяаттай болсон. Хүний гавьяат эмч цолоор Эх хүүхдийн эрүүл мэндийн үндэсний төвийн тасгийн эрхлэгч Луузангийн Ганбаяр, Улсын 2-р төв эмнэлгийн Тусгай тасгийн эрхлэгч Цэдэнсодномын Жаргалсайхан, “Идэрмэг” эмнэлгийн ерөнхий эмч Цэдэнсодномын Нямаа, “Далд засал” эмнэлгийн ерөнхий эмч Жамьянжавын Сэржмядаг нар шагнуулсан.

Эрүүл мэндийн салбарыг чанар, үр дүнд суурилсан гүйцэтгэлийн санхүүжилтийн цоо шинэ тогтолцоонд шилжүүлэх үйл явцыг удирдан, даатгуулагч иргэн, эрүүл мэндийн бүх шатны байгууллагын дунд бат бэх гүүр болон ажиллаж буй Эрүүл мэндийн даатгалын ерөнхий газрын дарга Ламжавын Бямбасүрэн Эрүүлийг хамгаалахын гавьяат ажилтан цол хүртсэн юм.