Х.Баттулга, Б.Чойжилсүрэн нар Халдашгүй байдлын дэд хорооны гишүүн болж “Халдашгүй эрх”-ээ дархлав

       УИХ-ын сонгуулийн үр дүнд бүрдсэн 126 гишүүнтэй анхны парламент наадмын өмнөхөн байнгын хороодын дарга нараа сонгож, сайд нарыг шөнө дөлөөр томилсон. Эдгээр томилгооноос анхаарал татсан нь УИХ-ын гишүүний халдашгүй байдлын дэд хорооны шинэ гишүүд юм. Өмнөх парламентын үед тус дэд хороо хамгийн олон удаа сонгогдсон таван гишүүнээс бүрдэж байсан бол энэ удаад Хөгжлийн банк, нүүрсний хулгай, тендер, төмөр зам, ЖДҮ, Боловсролын зээлийн сан зэрэг асуудалд нэр холбогдсон хүмүүсээс бүрдсэн талаар улс төрийн хүрээнийхэн жиг жуг гэлцэж байна. Тэр дундаа Х.Баттулга, Б.Чойжилсүрэн, Л.Энх-Амгалан, С.Бямбацогт, С.Ганбаатар, Ж.Энхбаяр нарыг УИХ-ын гишүүний халдашгүй байдлын дэд хорооны гишүүнээр сонгосон нь хачирхалтай гэхээсээ илүү Монгол төрийн эмгэнэл биш үү. Сонгуулийн үеэр “Булганыхан анхдагчид. Монгол Улсын Ерөнхийлөгч асан хүнийг УИХ-ын гишүүнээр сонгосон анхны аймаг болбол яаж байна” хэмээн сонгогчдыг даажигнасан Х.Баттулгын “Хар фактууд” хэвлэл мэдээлэл, интернэтээр дүүрэн учир энд нурших нь илүүц. Зуны халуун, сонгуулийн халуун ид давхцах үед зарим сэтгүүлч АТГ-ын үүдэнд хэвлэлийн бага хурал зарлаж, Х.Баттулгатай холбоотой 400 хуудас материалыг шалгуулах болсноо мэдэгдсэн ч АТГ-ынхан таг чиг. Хууль зүй, дотоод хэргийн сайд асан Ц.Нямдорж 2014 онд Х.Баттулгыг сайдаас огцрох үеэр “Сайд огцруулах үеэр чи УИХ дээр орж ирдэг. Татвар чөлөөлүүлэх болохоор орж ирдэг. Засгийн газар дээр мөнгө нэхэх болохоор чи орж ирдэг. Бусад үед чи Засгийн газрын хуралдаанд суудаггүй, “Баянгол”-доо хэвтэж байдаг чинь үнэн” гэж байв. Харин энэ удаад Х.Баттулга Монголын улс төр дэх гол холбоотон гэгддэг МАН-ын дарга Л.Оюун-Эрдэнийг Ерөнхий сайдаар дахин томилох үеэр чуулганы нэгдсэн хуралдаанд үзэгдсэнгүй. Сайд нарыг томилох үеэр ч бас харагдсангүй. Ц.Нямдоржийн хэлсэнчлэн “Х.Баттулга мөн том байна аа”.

УИХ-ын гишүүн Б.Чойжилсүрэн... 2012 оны сонгуулиар сонгогчдод мөнгө тарааж буй бичлэг нь ил болж “Төрийн эрхийг хууль бусаар авахыг завдсан” гэх хэрэгт буруутгагдаж УИХ-ын гишүүнээс эгүүлэн татагдахдаа тулж явсан ч тэрбээр энэ хэргээс “ид шид”-ийн гэмээр мултарч, УИХ-ын гишүүн хэвээр үлдэж байв. МАН парламентад үнэмлэхүй олонхи болоход тэрбээр Сангийн сайд, Эрчим хүчний сайд болж мандан бадарсан. Харин одоо УИХ-ын гишүүний халдашгүй байдлын дэд хорооны гишүүн. Х.Баттулга, Б.Чойжилсүрэн хоёроос гадна УИХ-ын гишүүний халдашгүй байдлын дэд хорооны гишүүн болсон бусад гишүүнийг бас харчих. Интернэтээс хайлт хийгээд үзвэл, холбогдсон хэрэг, дэгдээсэн дуулиан, авсан тендер, ЖДҮ, Боловсролын зээлийн сантай холбоотой мэдээлэл нь ядах юмгүй гарч ирнэ. Ийм л “Шигшээ багийнхан”-аар халдашгүй байдлын дэд хороог бүрдүүлжээ. УИХ-ын гишүүний халдашгүй байдлын дэд хороо нь УИХ, түүний гишүүний бүрэн эрхтэй холбоотой асуудлыг хэлэлцэн шийдвэрлэх эрхтэй. Өөрөөр хэлбэл, авлига, албан тушаалын зэрэг гэмт хэрэгт холбогдон шалгагдаж байгаа УИХ-ын гишүүний бүрэн эрхийг түдгэлзүүлэх саналыг Улсын ерөнхий прокурор УИХ-ын даргад ирүүлнэ. УИХ-ын гишүүний халдашгүй байдлын дэд хороогоор энэ асуудлыг хэлэлцэж, тухайн гишүүний бүрэн эрхийг түдгэлзүүлэх эсэхийг хэлэлцэж, чуулганы нэгдсэн хуралдаанд дүгнэлтээ танилцуулдаг. Эндээс харвал, хэнийг УИХ-ын гишүүн хэвээр үлдээх, хэнийг “Хонгил”-оор чирэх эсэхийг Х.Баттулга тэргүүтэн шийдэх нь. Улсын ерөнхий прокурор нь түүнийг Ерөнхийлөгч байх үед томилогдсон... МАН УИХ-ын сонгуульд дахин ялсныхаа хариуг Х.Баттулгад ийнхүү барив бололтой.

                                                                                                                                                       Ж.Энх