Х.Нямбаатар, Д.Сумъяабазар нар МАН-ын Удирдах зөвлөл дээр Л.Оюун-Эрдэнэд уур бухимдлаа илэрхийлсэн гэв үү

         МАН-ын дарга Л.Оюун-Эрдэнэ Монгол Улсын Ерөнхий сайдаар дахин томилогдлоо. Үндсэн хуульд оруулсан нэмэлт өөрчлөлтөөр тэрбээр үнэмлэхүй эрх мэдэлтэй. Энэ эрхээ эдэлж, УИХ-ын 2024 оны сонгуулийн дараа танхимаа шинээр бүрдүүлсэн. МАН, АН, ХҮН намаас томилох сайд нараа МАН-ын Удирдах зөвлөлд танилцуулсныхаа дараа УИХ-д өргөн барих ёстой байсан ч Л.Оюун-Эрдэнэ энэ удаад алгасч, УИХ-ын даргад шууд өргөн барьсан нь эрх баригч хүчнийхний эгдүүцлийг төрүүлсэн. Сайд нарыг томилсон тэр шөнө улс төрийн “хөшиг”-ний цаана чухам юу өрнөв. Ерөнхий сайд Л.Оюун-Эрдэнэ МАН-д үүссэн уур амьсгалыг зөөллөх гэсэн үү, Удирдах зөвлөлийн хурлаа шөнийн цагаар цахимаар хийсэн. Энэ үеэр МАН-ын Удирдах зөвлөлийн зарим гишүүн “АН-д Хууль зүй, дотоод хэргийн яам, Монгол Улсын сайд, 20 минутын хот төслийн Үндэсний хорооны даргын суудал, Хот байгуулалт, орон сууцжуулалтын яамаа “бэлэглэдэг” нь буруу. ХҮН намыг Худалдан авах, хөрөнгө оруулалт хариуцсан Шадар сайдын албан тушаалаар “шагнадаг” нь яаж байгаа юм бэ” хэмээн бухимдсан бол Л.Оюун-Эрдэнэтэй улс төрд өнөөг хүртэл шадарласаар ирсэн Х.Нямбаатар, Д.Сумъяабазар нар ч уур бухимдлаа илэрхийлсэн сурагтай. Х.Нямбаатар Ерөнхий сайдад “Ерөнхий сайд аа, та сонгуулийн дүнд “мэс засал” хийчихлээ шүү. “Сонгуулийн үр дүнгээр хуваарилна” гэж амласан эрх мэдлийн шударга хуваарилалт чинь хаана байна аа. МАН нийслэлд 18 суудал авч байж Засгийн газраа байгуулах боломж, энэ үнэ цэнийг хааш нь хийчихэв ээ” гэсэн бол Д.Сумъяабазар “Дарга нар төрийн аппаратынхныг хөдөө авч явж ажиллуулсан. Хувиа хичээж, бусад нэр дэвшигчээ унагаад хөдөөд ялагдал их хүлээлээ. Хотод 18 суудал аваагүй бол юун Засгийн газар байгуулахтай манатай байсан шүү” хэмээн хүч нэмсэн талаар эрх баригч хүчнийхэн ил, далд ярьцгааж байна. МАН-ын Удирдах зөвлөл ийнхүү халуухан, ширүүхэн болж өнгөрснөөс харвал, Ерөнхий сайд Л.Оюун-Эрдэнэ ганцаардсан дүр зурагтай. Сонгуульд ялагдсан, сайдын суудалд заларч чадаагүй, “Бялуу” хуваалтаас гадна үлдсэн гишүүдийн гомдол, хорсол түүнийг ийм байдалд хүргэв бололтой. Тэр ч атугай “Г.Занданшатар, Д.Тогтохсүрэн зэрэг хууль санаачлах, боловсруулах хашир туршлагатай гишүүдээ зориуд унагаж, 126 гишүүнтэй анхны парламентыг хууль унших, бичих туршлагагүй, кнопчидоор дүүргэлээ” гэх шүүмжлэл ч улс төрд ид өрнөж байна. Ирэх намар орон нутгийн сонгууль болно. Энэ сонгуульд, тэр дундаа нийслэлд ялалт байгуулах нь МАН-ын дарга, Ерөнхий сайд Л.Оюун-Эрдэнийн “шүдний өвчин” болж байна. Энэ хүсэл, хясал дээр нь Х.Нямбаатар, Д.Сумъяабазар нар дөрөөлж, МАН-ын Удирдах зөвлөлийн хурал дээр ганцаардсан Ерөнхий сайдыг шахаанд оруулав уу гэмээр нөхцөл байдал ч дээрх мэдээллээс харагдана. Учир нь Х.Нямбаатар нийслэлийн МАН-ын хорооны дарга, харин Д.Сумъяабазар саяхан тус намын нарийн бичгийн дарга болсон. Эрх баригч хүчин орон нутгийн сонгуулиар нийслэлд ялах эсэх нь Х.Нямбаатар, Д.Сумъяабазар нарын хоршил хэр сайн ажиллахаас шалтгаална. Тиймээс Ерөнхий сайд Л.Оюун-Эрдэнэ хүссэн ч, эс хүссэн ч тэднийг түшихээс өөр гарцгүй. “Нийслэлийн МАН-ын хороо бол МАН-ын 50 хувь” гэж тус намынхан ярьцгаадаг. Энэ том нэгдлийг хүчтэй хэвээр үлдээж чадах эсэхээс Л.Оюун-Эрдэнийн хувь, хувьсгалын улс төрийн карьер, хувь заяа шалтгаална. Тодруулбал, хүний, өөрийн намынхан энэ Засгийн газар хэр удаан тогтох эсэх тухай “тоолуур”-ыг аль хэдийнэ ажиллуулаад эхэлчихсэн.  

                                                                                                                                                     Д.Анир