Ч.Өнөрбаярыг ХЗДХЯ-ны ТНБД-аар томилох эсэхэд Ерөнхий сайд Л.Оюун-Эрдэнэ татгалзсан хариу өгчээ

        Эрх баригч хүчний тэргүүн МАН, АН, ХҮН намаас бүрдсэн хамтарсан Засгийн газраа байгуулсан. Гурван нам 2024-2028 онд хамтран ажиллах санамж бичиг байгуулж, мөрийн хөтөлбөрөө “Хурдтай хөгжлийн төлөөх Зориг” хэмээн тодорхойлж буй. МАН-ын дарга Л.Оюун-Эрдэнэ Монгол Улсын 33 дахь Ерөнхий сайдаар томилогдохдоо УИХ-ын чуулган дээр “Төр, нийгмийн зүтгэлтэн С.Зориг агсны үзэл санааг үргэлжлүүлнэ” гэж мэдэгдсэн учраас ийнхүү “Зориг” гэх үгээр тодотгосон болов уу. Хамтарсан Засгийн газрын сайд нарыг наадмын өмнөхөн томилсон бол дэд сайд нарыг ажлаас нь чөлөөлсөн. Хэдийгээр “Дэд сайдгүй Засгийн газар байна” гэх мэдээллийг холбогдох эх сурвалжууд өгсөн ч үүнийг үгүйсгэх хүмүүс бий. Өөрөөр хэлбэл, “Засгийн газрын 100 хоногтой уралдан дэд сайдын суудлыг дахин бий болгоно” гэх яриа улс төрийн хүрээнд өрнөж байна. МАН, АН, ХҮН намаас томилогдсон сайд нар өдгөө яамдынхаа бүтцийг эрх баригч хүчнийхэнтэй зөвшилцөж, томилгоогоо хийж байна. УИХ-ын 2024 оны сонгуульд Чингэлтэй, Сүхбаатар дүүрэгт АН-аас нэр дэвшсэн Ч.Өнөрбаярыг Хууль зүй, дотоод хэргийн яамны Төрийн нарийн бичгийн даргаар томилохоор болсон тухай мэдээлэл зарим хэвлэлд нийтлэгджээ. Гэвч Ерөнхий сайд Л.Оюун-Эрдэнэ үүнд татгалзсан хариу өгсөн аж. Ч.Өнөрбаярын хувьд, АН-ын Ерөнхий нарийн бичгийн даргаар ажиллаж байсан бөгөөд Ерөнхийлөгч асан Ц.Элбэгдоржийн фракцийнх гэгддэг. Учир нь тэрбээр Ц.Элбэгдоржийг Ерөнхийлөгч байх үед хуулийн зөвлөхөөр нь ажиллаж байсан.    

                                                                                                                                                       Ж.Энх