“Хотын захиргааг Яармаг руу нүүлгэхэд 1.5 тэрбум төгрөг, Дээд шүүх “Хангарьд” ордныг 8.2 тэрбумаар засварлаж орно” гэв үү

       УИХ-ын сонгуулийн үр дүнд 126 гишүүнтэй анхны парламент бүрдсэн. Тиймээс Төрийн ордонд шинэ гишүүдэд өрөө гаргаж өгөх, чуулганы танхимыг шинээр засварлан тохижуулах их ажил өмнөх парламентын үед эхэлсэн. УИХ-ын гишүүдийн өрөөг тохижуулахад улсын төсвөөс 12 тэрбум төгрөг зарцуулахаар болсон гэх мэдээлэл ч бий. УИХ-ын гишүүдийн тоо ийнхүү нэмэгдсэн учраас Засгийн газрын аппаратыг ТЕГ-ын байр руу нүүлгэж, ТЕГ-ыг Хөшигийн хөндийд шинээр барих төр засгийн нэгдсэн цогцолборт байрлуулахаар болсон тухай хэвлэлүүдэд мэдээлсэн. Хот байгуулалт, барилга, орон сууцжуулалтын сайд Ж.Батсуурь саяхан “Энэ дөрвөн жилд Засгийн газрын ордныг Улаанбаатар хотоос гаргахаар төлөвлөсөн. Ингэснээр яам, тамгын газар руу зорьж, төв рүү тэмүүлэх төвлөрлийг сааруулна. Томоор төсөөлбөл, Улаанбаатар хот шууд л тэлэх болно” гэж ярьсан. Д.Сумъяабазарыг нийслэлийн Засаг дарга байх үед буюу 2020 онд Улаанбаатар хотын 2021 оны төсөвт нийслэлийн захиргааг Яармаг руу шилжүүлэн нүүлгэх болсонтой холбогдуулан автозам барихад 1.7 тэрбум төгрөг тусгаж байв. Харин энэ удаад хотын захиргааг Яармаг руу нүүлгэхэд 1.5 тэрбум, Улсын Дээд шүүх “Хангарьд” ордныг 8.2 тэрбум төгрөгөөр засварлаж орох тухай мэдээлэл анхаарал татаж байна. Монгол Улсын Соёлын гавьяат зүтгэлтэн, сэтгүүлч Б.Ганчимэг энэ талаар фэйсбүүк хуудастаа “Яндаж болдоггүй далай шиг Яасан баян төсөв бэ. Хотын захиргаа 1.5 тэрбумаар Яармаг руу нүүж, Дээд шүүх “Хангарьд” ордныг 8.2 тэрбумаар засварлаж орно гэнэ. Дээд шүүх нь “Хангарьд” руу 1.1 тэрбумаар нүүнэ. Зөвхөн нүүлгэлтэд 2.6 тэрбум зарцуулах юм уу. Дээд шүүх бас 2.1 тэрбумаар тавилга авна гэнэ. Үнэхээр үзэн ядалт хуралдаж байна” хэмээн постолжээ.

      Тэрбээр “Хангарьд” ордон ээлжит мөнгө угаалтын “бай” болчихлоо. Ордон гэх нэрэнд манайхан донтой болохоос жирийн л оффис шүү дээ. Гэхдээ үнэхээр үнэ цэнтэй байршил мөн үү гэвэл мөн. Манай хотод хуучиндаа орж, бүр шинэ тансаг ордон барих хэмжээний 8,2 тэрбумаар их засвар хийгээд байхаар насжилттай барилга ч биш. Ер нь төрийн байгууллагууд нэгээс нөгөө рүү нүүж суухдаа 2.6 тэрбум зарцуулаад байх түвшний баян оронд амьдарч байгаагаа би огт мэдээгүй. Бүр огт мэдрээгүй. Өдөр ирэх тусам амьсгал боогдох мэт гуниг төрөх нь л нэмэгдсээр байгаа. Зугаалж, аялж ч чадахгүй дотор бачимдаж байгаа. Миний л хувьд ийм байна. Дараагийн зүйл, “Хангарьд” ордныг мөнгө угаах аятайхан завшаан болгожээ гэж би хувьдаа харж байна. Нэг нь явж, нөгөө нь ирэхдээ 2,6 тэрбум зарцуулахаар төсөвлөж шүү дээ. Яагаад гэнэт ийм юм болоод явчихав аа. Нийслэлийн өмчийн ашиглалт, удирдлагын газраас нийслэлийн засаг захиргааны “Хангарьд” ордны барилгыг хувьчлах нээлттэй дуудлага худалдааг аравдугаар сарын 20-нд зарласан биш билүү. Дуудлага худалдааны анхны үнийг 43 тэрбум 423 сая 400 мянган төгрөгөөр тогтоосон шүү дээ. Дээрээс нь дэнчингийн хэмжээг дөрвөн тэрбум 342 сая 340 мянган төгрөгөөр тооцсон. Энэ шийдвэр хаачив аа. Энэ завхарсан юмаа зогсоо. Яасан ч ийм юм хийлгэхгүй шүү. Нэг оффисоос нөгөө рүү орохдоо 2,6 тэрбум зарна гэнэ ээ. Дээд шүүх нь 2,1 тэрбумаар тавилга авах гэнэ” гэжээ. Нийслэлийн Засаг дарга Х.Нямбаатар болон холбогдох албан тушаалтнууд энэ асуудалд тайлбар хийнэ үү. Өмнөх парламентын үед Төрийн хэмнэлтийн тухай хуулийг баталсан. Энэ хууль ингээд гууль болов уу.

                                                                                                                                                        Д.Ган