О.Баасанхүү: Яллагдагч 15, шүүгдэгч 4, хүн амины 2 хэрэгтнийг ард түмэн огт мэдэлгүй УИХ-ын гишүүнээр сонгосон

УИХ-ын гишүүн асан О.Баасанхүү ЦЕГ-ын дарга болох саналаа АН-ын дарга Л.Гантөмөрт уламжилснаа өчигдөр (2024.07.29) твиттер хуудсаараа дамжуулж мэдэгдсэн. Тэрбээр өнөөдөр твиттерт “Манай ард түмэн УИХ-ын сонгуулиар ёстой сонин сонголт хийсэн. Хэдийгээр МАН, АН, ХҮН, ИЗНН гэх боловч үүн дотор нь биеэ үнэлэгч зургаа, шүүгдэгч дөрөв, ижил хүйстэн гурав, яллагдагч 15, хүн амины хоёр хэрэгтнийг огт мэдэлгүй сонгосон байх юм” хэмээжээ. О.Баасанхүүгийн хувьд, хуульч мэргэжилтэй, өмгөөллийн ажлын туршлагатай, УИХ-ын гишүүн байхдаа сөрөг хүчний үүргийг чамлахааргүй гүйцэтгэж явсан эрхэм. Хуулийн хүрээнд ч, улс төрийн хүрээнд ч мэдээлэл сайтай гэдэг нь тодорхой. Тэгэхээр түүний твиттерт бичсэнчлэн ард түмэн эрүүгийн онц ноцтой гэмт хэрэгтнүүдийг хууль тогтоох дээд байгууллагад намтар түүхийг нь ч судлалгүйгээр сонгосон бол эмгэнэлтэй л юм. О.Баасанхүүгийн мэдээлэл ор үндэслэлтэй эсэхийг батлахын тулд УИХ-ын 126 гишүүний намтраас эхлээд хууль хяналтын байгууллагад ямар хэрэгт шалгагдаж байсан, мөн шалгагдаж байх хугацаандаа парламентад шургалсныг шилэн болгох нь зөв болов уу. Экс гишүүний дээрх мэдээллээс гадна нүүрсний хэрэгт холбогдсон, говь нутгийн газрыг наймаалцсан зэрэг асуудлаар прокурор дээр хэргийг нь боосон гэх зарим хүн УИХ-д сонгогдсон гэх мэдээлэл ч бий. Х.Алт