“УИХ-д сонгогдсон” гэх хүн амины 2 гэмт хэрэгтнийг О.Баасанхүүгээр нэрлүүлье

         Монголын улс төр яг л кинонд гардаг шиг криминал сэдвээр дүүрэн... Авлига, албан тушаалын гэмт хэрэгтнүүдээр “Хар жагсаалт” нь хөвөрдөг байсан бол ЖДҮ-чид, тендерчид, концессчид, нүүрсчид, Боловсролын зээлийн санчид, тэр ч атугай “Ногоон автобустнууд”-аар хүрээгээ тэлсэн. Тэгвэл одоо 126 гишүүнтэй анхны парламентад “хиамчид”, лаивчдын төлөөлөл намын нэрсийн жагсаалтаар орж ирээд УИХ-ын гишүүний суудалд заларчихаад байна. “Хиамчид” гэдэг нь цахим ертөнцөд төлбөрт мэдээ бичдэг, түгээдэг, сэвдэг хөлсний армийнхан. Харин дуучин Нараг лаив хийж бараа сурталчилдаг гэдгийг сошиал хэрэглэгчид сайн мэднэ. Хууль тогтоох дээд байгууллагад ийнхүү ёстой л өнгөт үрэл шиг “Шигшээ багийнхан” цугларч, төрийн хууль батлах бүрэн эрхтэй болсон. Гэвч үүнээс ч илүү ноцтой байж мэдэх мэдээллийг УИХ-ын гишүүн асан О.Баасанхүү твиттер хуудсаараа дамжуулан олон нийтэд мэдээллээ. Тэрбээр өчигдөр (2024.07.30) “Манай ард түмэн УИХ-ын сонгуулиар ёстой сонин сонголт хийсэн. Хэдийгээр МАН, АН, ХҮН, ИЗНН гэх боловч үүн дотор нь биеэ үнэлэгч зургаа, шүүгдэгч дөрөв, ижил хүйстэн гурав, яллагдагч 15, хүн амины хоёр хэрэгтнийг огт мэдэлгүй сонгосон байх юм” гэж жиргэсэн.    Энэ бол жирийн иргэний хувьд, олны анхаарлыг татаж хандалт авахын тулд бичсэн мэдээлэл биш. УИХ-ын гишүүн асан, өмгөөлөгч, хууль хяналт болон улс төрийн хүрээнд тодорхой мэдээлэл бүхий хүний хувьд “Энэ УИХ-д ийм гэмт хэрэгтнүүд шургалчихсан шүү” гэх анхааруулга өгөх гэснийх болов уу. Тэгэхээр УИХ-ын гишүүний халдашгүй бүрэн эрх гэдэг хамгаалалт дор хэн гэдэг хүн амины хоёр гэмт хэрэгтэн, дөрвөн шүүгдэгч, 15 яллагдагч орж ирээд суучихсаныг О.Баасанхүүгээр зарлуулъя. Хууль тогтоох дээд байгууллагыг гэмт хэргээс бултах, зугтах “Хоргодох байр” болгосон тэдгээр онц ноцтой гэмт хэрэгтнүүдийн нэрсийг О.Баасанхүүгээр бас хэлүүлье. Хуулийнхан түүнийг гэрчээр дуудаж, хамгаалалтад авна биз. Харин яг одоо О.Баасанхүүгийн мэдээллийн дагуу хууль хяналтынхан арга хэмжээ авахыг олон нийт шаардъя. ЦЕГ-ын дарга, генерал Т.Сүхболд СЕХ-ны гишүүн. Тийм атал УИХ-д онц ноцтой гэмт хэрэгтнүүд сонгогдсон бол аймшигтай. Улсын ерөнхий прокурор Б.Жаргалсайхан энэ асуудлыг анхааралдаа авч, О.Баасанхүүгийн мэдээлэл үнэн бол УИХ-ын гишүүн болсон онц ноцтой гэмт хэрэгтнүүдийн бүрэн эрхийг түдгэлзүүлэх саналыг нэн даруй УИХ-ын даргад хүргүүлэх нь зөв биз ээ. Ерөөс “Энэ УИХ-аас хамгийн түрүүнд эгүүлэн татагдах хүн хэн байх бол” гэдэг асуулт УИХ-ын гишүүд тангаргаа өргөхтэй зэрэгцэн гарч ирсэн. Алийн болгон УИХ-ын гишүүний халдашгүй бүрэн эрх гэдэг хамгаалалт дор гэмт хэрэгтнүүдийг хамгаалах вэ. О.Баасанхүүг яг одоо гэрчээр дуудаж, түүний бичсэнчлэн гэмт хэрэгтнүүд гэдгийг нь огт мэдэлгүйгээр УИХ-д сонгосон ард түмэнд үнэнийг мэдэх эрхийг нь олгоё. Хууль хяналтынханд хар данстай гишүүд өөдөөс чинь харж суучихаад камерийн өмнө шударга ёс, хүний эрхийн талаар гоё гоё асуултууд тавьж, хуулиа шударгаар сахиулахыг шаардаж суух нь гутамшигтай санагдана биз дээ, Т.Сүхболд генерал аа, Б.Жаргалсайхан прокурор оо. “Газрын ойр Гарзын бага дээр...” гэж сайд асан Ц.Нямдорж хэлж байсныг ч энд сануулъя, мөн биз.

                                                                                                                                                     Н.Гэрэл